Deputetja Elisa Spiropali ka replikuar sot me rivalin e saj politik, Gazment Bardhin. Duke iu drejtuar këtij të fundit dhe qendrimeve të tij ndaj SPAK, Spiropali tha se ai duhet ta ndajë se cili është në të vërtetë.
“Je ai që lufton për drejtësi Gazi apo je ai që merr porositë për të folur këtu nga goja e “Rrugës së shpresës” që nuk pushon së hedhuri vrer për SPAK-un. Je ai që kërkoje hetim dhe ndëshkim për babin e Zenit apo je djali i sapo adoptuar i babait të Zenit. Të ndryshosh mendje nuk është mëkat, por të kesh dy mendje është hall i madh. Sado që ta kuptoj hallin koleg, nuk ta qaj dot. Edhe një herë, ne dhe ju, dy kampe që edhe për datat në kalendar nuk biem dakord, edhe për rezolutën që është sjellë sot për tu votuar, deklaroni votën abstenim. Keni ndryshuar, nga kundër, abstenim. Jeni në të drejtën tuaj. Ju ftoj të reflektoni, e bindur se gjithmonë ka kohë. Pavarësisht se si do të votoni, edhe ju e dini mirë që rezoluta për themelimin e reformave për Shqipërinë 2030 në BE e propzuar për tu votuar nuk është një ndryshim kursi i vendit. Ajo është një vijim i natyrshëm dhe një thellim i reformimit duke u nisur nga maja e më të mirës që është bërë deri tani dhe një premtim për të çuar në një nivel tjetër përpjekjet antikorrupsion” – tha Elisa Spiropali.
Ajo shtoi se opozita gaboi kur dogji mandatet, kur nuk mori pjesë në zgjedhjet politike dhe kur u vetëpërjashtua nga komisioni për reformën Administrativo-Territoriale. Ndaj deputetja socialiste shtoi se priste që PD të kishte nxjerrë mësime nga këto.
Më herët Gazment Bardhi akuzoi qeverinë si të kriminalizuar dhe u shpreh se do ta bojkotojnë votimin e rezolutës anti-korrupsion.
/a.r
