Ditën e sotme në orën 17:30, Gjykata Kushtetuese do të shpallë vendimin për ‘fatin’ e ministres ‘Diella’.
Shpallja e vendimit pritet pasi Gjykata Kushtetuese ka mbyllur shqyrtimin gjyqësor për padinë e Partisë Demokratike kundër dekretit të Presidentit Bajram Begaj për emërimin e ministres virtuale të Inteligjencës Artificiale, “Diella”.
Më 23 shtator 2025, deputetët demokratë iu drejtuan Kushtetueses me padi duke kundërshtuar dekretin e Bajram Begajt që në nenin 2 të tij autorizonte Kryeministrin Edi Rama për funksionimin e ministrisë virtuale.
Demokratët argumentojnë se krijimi i një “ministri virtual” është në tejkalim të kompetencave të Presidentit të Republikës, cenon kompetencat e Kryeministrit dhe Këshillit të Ministrave.
“Caktimi i përgjegjësive të reja nga Presidenti për Kryeministrin vjen në kundërshtim me Kushtetutën dhe ligjet”, thuhet në argumentimin e PD.
Sipas tyre, vetëm Kuvendi ka të drejtën të miratojë ndryshime ligjore apo kushtetuese që prekin kompetencat dhe përgjegjësitë e Kryeministrit dhe qeverisë.
Njoftimi i Gjykatës Kushtetuese:
Të nderuar kolegë,
Kryetarja e Gjykatës Kushtetuese, znj. Fiona Papajorgji, do të zhvillojë sot, në orën 17:30, një komunikim me gazetarët lidhur me vendimmarrjen për çështjen me objekt:
“Shfuqizimin e nenit 2, të Dekretit “Për emërimin e Kryeministrit”, nr. 331, datë 12.09.2025, të Presidentit të Republikës së Shqipërisë si të papajtueshëm me Kushtetutën e Republikës së Shqipërisë; si dhe shfuqizimin e nenit 1, pika 1, fjalia e dytë, të Dekretit “Për emërimin e Këshillit të Ministrave”, nr. 333, datë 15.09.2025, të Presidentit të Republikës së Shqipërisë si të papajtueshëm me Kushtetutën e Republikës së Shqipërisë”.
Takimi do të zhvillohet në ambientet e Gjykatës Kushtetuese.
Faleminderit.
