Moldavia do të jetë “finalja e parë” nga 7 të tilla për Shqipërinë e teknikut Sylvinho, në rrugëtimin e kuqezinjve për në finalet e Euro2024.
Me synimin për të hedhur pas krahëve disfatën në ndeshjen hapëse te kualifikuesve në Poloni, kuqezinjtë do të synojnë fitoren në këtë sfidë me rëndësi të veçantë që starton në 20:45, në impiantin “Air Albania”.
Trajneri Sylvinho ka kristalizuar idetë për skuadrën që do të hedhë në fushë, duke shuar edhe dilemën kryesore, atë se kujt midis Berishës dhe Strakoshës do t’i besonte ruajtjen e portës.
Do të jetë gardiani i Torinos ai që do të ruajë katërkëndëshin e Shqipërisë, ndërsa nuk ka dilema në sektorët e tjerë të fushës.
Mungesa e Balliut në mbrojtje bën që Hysaj të spostohet nga e djathta, teksa në krahun e majtë do të jetë Mitaj. Në qendër luan dyshja ‘italiane’ Ismajli-Gjimshiti.
Vendin e të dëmtuarit Gjasula në mesfushë e ka marrë Ramadani, i cili ka arritur të fitojë balotazhin me Asllanin. Ai do të ketë përkrah të rikthyerin Keidi Bare dhe Nedim Bajramin e Sasuolos për të plotësuar treshen e mesfushës.
Asani dhe Uzuni do të luajnë nga krahët, ndërsa në majën e sulmit kuqezi do të jetë Sokol Cikalleshi.
Me formacionin 4-3-3, por me shumë lojtarë në fazën offensive, Sylvinho kërkon kështu triumfin e parë në Grupin E.
Çdo rezultat që nuk është fitorja në Arenën Kombëtare do të ishte dështim dhe rrezikon të kompromentojë ecurinë e skuadrës prej startit të kualifikueseve.
