Skuadra e Vllaznisë në volejboll për meshkuj, kryesuese e kampionatit në përfundim të fazës së parë (me 22 pikë, po aq sa Erzeni), kërkon të përsëritë suksesin e dy sezoneve më parë, kur shpallej kampione e Shqipërisë. Për këtë arsye, në Shkodër po mendojnë se si të përforcojnë skuadrën dhe kanë nisur të shohin në merkato. Madje në qytetin verior ka mbërritur sot një volejbollist nga Bjellorusia, Yauheni Misiyuk.
Misiyuk, një volejbollist shtatlartë, 1.99 metra i gjatë, ka firmosur me skuadrën shkodrane dhe ka nisur menjëherë nga puna me ekipin e tij të ri. Bjellorusi 29-vjeçar ka shumë përvojë në arenën ndërkombëtare dhe luan diagonalist me pasin, pozicion ku shkodranët shpesh kanë shfaqur mangësi këtë sezon. Mësohet se Misiyuk ka luajtur edhe në Rusi e Lituani, ndërkohë që për herë të parë zbarkon në kampionatin shqiptar një volejbollist bjellorus.
