Superliga shqiptare e futbollit nisi të premte raundin e 23-të. Tri pikë për Egnatian dhe Vllazninë, ndërsa këtë të shtunë Laçi dhe Partizani barazuan 0-0. Po sot në fushë edhe katër skuadra.
Në “Arena Egnatia” vendasit e Egnatias fituan 2-1 kundër Bylisit në një ndeshje që dhuroi një fund emocionues. Fitorja e katërt radhazi për Egnatian që vijon të jetë në krye të renditjes. Golat e ndeshjes u shënuan në pjesën e dytë dhe ishte Egnatia që kaloi në epërsi të dyfishtë me Regi Lushkjan dhe Edison Ndrecën. Në minutën e 83 Ayodeji shkurtoi shifrat për ta bërë fundin e ndeshjes dramatik. Në fund suksesi foli për djemtë e Edlir Tetovës, ndërsa miqtë nga Ballshi shohin humbjen e dytë radhazi pas një ecurie pozitive.
Në “Niko Dovana” të Durrësit fitues ishin miqtë e Vllaznisë. Teuta e Bledar Devollit “ra” për të dytën ndeshje radhazi dhe këtë herë 1-3. Vetëm disa sekonda iu deshën shkodranëve për të kaluar në epërsi me Esat Malën, ndërsa Balaj do dyfishonte me penallti brenda pjesës së parë. Talenti Kevin Dodaj la shenjë në këtë duel me golin e tretë, ndërsa Mario Beshiraj ngushtoi shifrat për vendasit.
Në Laç vendasit barazuan 0-0 kundër Partizanit. Të kuqtë marrin barazimin e dytë radhazi dhe shohin t’i largohet kreu. Në fund pati tension mes lojtarëve, me trajnerët Moreiro dhe Veselinovc që u futën në fushë për të shuar gjakrat.
Pas këtyre ndeshjeve është Egnatia që vijon të kryesojë renditjen me 42 pikë, dy më shumë se ndjekësit e Vllaznisë. Emrat në klasifikim mund të ndryshojnë pas rezultateve të tre ndeshjeve të sotme.
Superliga, raundi 23:
E premte, 31 janar 2025
13:30 Egnatia 2-1 Bylis
16:30 Teuta 1-3 Vllaznia
E shtunë, 01 shkurt 2025
13:30 Laçi 0-0 Partizani
16:30 Dinamo – Skënderbeu
16:30 Tirana – AF Elbasani
