Policia e Lezhës së bashku me forcat RENEA kanë përmbyllur një superaksion anti kanabis në ambientet e ish pularisë së qytetit të Rrëshenit, ku sipas të dhënave ende të pakonfirmuara, bëhet fjalë për sekuestrimin e mbi një ton kanabisi.
RENEA është bërë pjesë e aksionit pasi policia dyshonte se brenda ish pularisë mund të kishte persona të armatosur.
Deri më tani raportohet nga Policia e Shtetit për mbi 15 persona të arrestuar.
Në aksion kanë marrë pjesë rreth 100 forca të policisë së Lezhës e Mirditës si dhe forcat e Ndërhyrjes së Shpejtë.
Me herët do të ishte deputeti demokrat Flamur Noka i cili përmes një postimi në rrjetin e tij social do të denonconte punishten e kanabisit, duke shtuar se kishte përplasje mes Policisë për ndërhyrjen dhe kapjen e drogës.
“Pazaret e drogës tashmë kanë kaluar nga konflikte mes bandash në përplasje brenda vetë Policisë. Në këto momente tek magazinat e ish pularisë në qytetin e Rrëshenit zbulohen sasi të frikshme droge.
Burime nga vendngjarja bëjnë me dije se janë rreth 3 ton drogë. Banesa është rrethuar nga një grup i policisë të krimit organizuar të Drejtorisë Lezhë. Policia e Rreshenit nuk pranon të ndërhyjë dhe i ka braktisur ndërkohë dhe uniformat blu të drejtorisë Lezhë nuk po guxojnë të ndërhyjnë. Pritet të vine nga RENEA. Kjo është “Policia që duam” në Kanabistan”, shkruante Noka./java/a.m.
