Vihet në prangat e policisë organizatori i tentativës së trafikut të 38 kilogramëve heroinë nëpërmjet portit të Durrësit, ku më 17 maj, u arrestua drejtuesi i kamionit në të cilin u konstatua lënda narkotike.
Në vijim të operacionit të koduar “Parkingu”, paraditen e sotme, Prokuroria nxori urdhrin e ndalimit për shtetasin Pirro Çapi, 55 vjeç, banues në lagjen nr.4 Durrës.
Në zbatim të urdhrit të ndalimit, uniformat blu e kanë kapur dhe ndaluar shtetasin Pirro Çapi, në afërsi të banesës së tij, në rrugën “Kumini”, në lagjen nr.4 Durrës.
Nga veprimet hetimore të kryera dyshohet se 55-vjeçari është organizatori dhe poseduesi i sasisë prej 38 kilogramë heroinë të kapur në 17 maj, në portin e Durrësit.
Ndërkohë, vijon puna për identifikimin dhe kapjen e personave të tjerë të përfshirë në këtë aktivitet kriminal.
Kapja e tij u bë pasi, në kamionin që drejtonte Dhimitër Zykaj dhe si rezultat i kontrollit, poshtë sediljeve u konstatuan dy vende të fshehura, brenda të cilave ishin fshehur 68 pako me lëndë narkotike të dyshuar heroinë, si dhe vunë në pranga drejtuesin e kamionit, 49 vjeç, banues në Babrru, Tiranë.
Lidhur me këtë ngjarje, materialet iu referuan Prokurorisë për ndjekje të mëtejshme, për veprën penale “Trafikimi i narkotikëve”, kryer në bashkëpunim.
/a.r
