Mjeti i një biznesmeni nga Shkodra, ka rënë pre e një sulmi. Makina tip “Tiguan” me targë AA 289 OA ngjyrë e bardhë, është sulmuar në fshatin Hot i Ri pjesë e njësisë Rrethina të Bashkisë Shkodër.
Mjeti është në pronësi të biznesmenit Nikolin Shqau. Ajo ndodhej e parkuar përpara derës së shtëpisë të biznesmenit në Hot të Ri, kur disa persona në mënyrë të papritur e kanë goditur mjetin, duke thyer xhamat dhe duke shkaktuar edhe disa dëme të tjera.
Në momentin kur ka ndodhur ngjarja, brenda mjetit nuk ndodhej askush, ndërsa edhe në rrugë nuk ka patur ndonjë kalimtar të rastit.
Menjëherë përmes një sinjali, pronari i mjetit ka kuptuar se diçka ka ndodhur dhe në momentin kur ka dalë jashtë ka parë makinën e dëmtuar.
Menjëherë ka njoftuar Policinë e Shkodrës dhe efektivët kanë mbërritur në vendin e ngjarjes, duke nisur hetimet pas kësaj ngjarje kriminale.
Mësohet se autorët, e kanë goditur mjetin tip “Tiguan” të biznesmenit Shqau me një shufër hekuri duke thyer pjesë përpara të xhamave, por edhe pjesën e pasme, raporton ‘Ora news’.
Më pas, atë shufër e kanë hedhur brenda makinës. Ndërkohë në anën e djathtë të mjetit, afër pasqyrës autorët kanë lënë edhe një letër të shkruar, një mesazh për pronarin, makina e të cilit u dëmtua.
Në letër ishte e paqartë se çfarë shkruhej, pasi ishte e palosur, por mesazhi bashkë me shufrën e hekurit janë sekustruar nga grupi hetimor i Policisë së Shkodrës.
Janë të paqarta arsyet e kësaj ngjarje, pasi pronari Nikolin Shqau ka deklaruar se nuk ka konflikte me ndonjë person.
Megjithatë, i vetmi dyshim është tek një person, i cili i ka kërkuar pronarit Shqau që ta marrë në punë tek bizneset e tij dhe ky i fundit ka refuzuar për një sërë arsyesh, sidoqoftë është vetëm një prej pistave të mundshme.
Ndërkohë disa metra më tutje, ka edhe kamera sigurie të një subjekti, duke qenë se mjeti ishte i parkuar në rrugën kryesore të fshatit Hot i Ri.
Policia e Shkodrës vazhdon hetimet për zbardhjen e plotë të ngjarjes, për identifikimin, gjetjen dhe kapjen e autorëve të dyshuar që sulmuan mjetin e biznesmenit.
