Prokurorët gjermanë kanë bërë të ditur sot arrestimin e një shtetasi ukrainas, i identifikuar si Serhii K., i dyshuar për organizimin e sabotimit të gazsjellësve Nord Stream 1 dhe 2 në shtator 2022.
Arrestimi u krye nga policia italiane në Rimini gjatë natës, bazuar në një urdhër-arrest evropian të lëshuar nga Gjermania.
Sipas prokurorisë federale gjermane, Serhii K. akuzohet se ka qenë një nga organizatorët kryesorë të operacionit që vendosi eksplozivë në gazsjellësit Nord Stream pranë ishullit danez të Bornholm-it.
Sulmi shkaktoi rrjedhje masive gazi dhe dëmtoi rëndë të dy gazsjellësit, duke ndërprerë një lidhje kyçe energjetike midis Rusisë dhe Evropës.
Hetuesit besojnë se grupi i përfshirë përdori një jaht të marrë me qira nga porti gjerman i Rostock-ut, duke përdorur identitete të rreme për të transportuar eksplozivët në vendngjarje. Gjurmë të eksplozivit ushtarak octogen u zbuluan më pas në bordin e jahtit.
Serhii K. konsiderohet njeriu që koordinoi sulmin së bashku me të tjerë dhe përballet me akuza për shkaktim të shpërthimit, sabotim antikushtetues dhe shkatërrim të infrastrukturës.
Suedia dhe Danimarka mbyllën hetimet e tyre pa identifikuar të dyshuar në fillim të këtij viti, ndërsa Gjermania vazhdoi hetimin, duke u përqendruar te një ekip i vogël zhytësish dhe stafi mbështetës që mendohet se kreu misionin.
Raporte nga zyrtarë perëndimorë kanë sugjeruar lidhje të mundshme me rrjete ukrainase, megjithëse Kievi ka mohuar vazhdimisht çdo përfshirje.
I dyshuari pritet të transferohet në Gjermani për t’u paraqitur para një gjykatësi federal në Karlsruhe, ku do të vazhdojë procesi gjyqësor.
