Rusia akuzoi Ukrainën për një sulm me dronë në Moskë, që dëmtoi dy godina dhe mbylli përkohësisht një prej aeroporteve në qytet. Sipas ministrisë së mbrojtjes, një dron u qëllua mbi zonën e Odintsovo në perëndim të qendrës së Moskës, ndërsa dy të tjerë ranë mbi një ndërtesë më zyra pas neutralizimit, duke dëmtuar fasadën. Agjencia e lajmeve TASS tha se një person kishte mbetur i plagosur në ngjarje. Foto dhe pamje nga vendi i ngjarjes treguan xhama të thyer dhe mbetje të shpërndara në rrugë.
Një dëshmitare, tha për agjencinë e lajmeve Reuters se kishte parë zjarr dhe tym.
“Miqtë e mi dhe unë morëm me qira një apartament dhe erdhëm këtu për të kaluar kohë bashkë. Një moment, dëgjova një shpërthim ..ishte si një dallgë e fuqishme dhe të gjithë kërcyem. Më pas zona u mbulua me tym dhe nuk mund të shihje asgjë. Nga lart dallohej zjarr”, tregon dëshmitarja.
Fluturimet u pezulluan përkohësisht nga aeroporti i Vnukovo, në jug-perëndim të qendrës së qytetit, dhe avionët që duhet të uleshin atje u ridrejtuan në aeroporte të tjera. Në një deklaratë, ministria e mbrojtjes tha se kishte parandaluar një përpjekje për sulm terrorist.
Sulmi me dron në orët e para të së dielës është i fundit mes atyre që Moska i ka atribuuar Kievit gjatë javëve të fundit. Mirëpo, Ukraina rrallë merr përgjegjësinë për akte të tilla në brendësi të territorit rus. Ministria e mbrojtjes në Rusi akuzoi gjithashtu forcat e Kievit për një sulm me dronë edhe ndaj territorit të Krimesë, e aneksuar që prej 2014-s. Sipas zyrtarëve, 16 dronë ishin shkatërruar dhe 9 të tjerë ishin ndalur. Sakaq, autoritetet ukrainase raportuan një sulm me raketa në qytetin Sumit, në veri-lindje të vendit, me pasojë vdekjen e 1 personi dhe plagosjen e 5 të tjerëve. Autoritetet thanë se dy vetë ishin vrarë gjithashtu në qytetin jugor të Zaporizhias.
