Sulmet me dronë mes Rusisë dhe Ukrainës kanë vijuar gjatë natës, me intensitet të lartë në të dyja drejtimet.
Autoritetet ruse njoftuan se forcat e mbrojtjes ajrore kanë interceptuar dhe shkatërruar 605 dronë ukrainas gjatë orëve të natës. Sipas Ministrisë ruse të Mbrojtjes, sulmet janë regjistruar në disa zona, përfshirë rajonin e Moskës, Detin e Zi dhe rajonin e Jaroslavlit. Në qytetin rus të Jaroslavlit, ku ndodhet një nga rafineritë më të mëdha të naftës në vend, pamjet e publikuara tregojnë një re të dendur tymi të zi pas një sulmi me dron. Guvernatori i rajonit, Mikhail Evraev, deklaroi se bëhej fjalë për sulmin më të madh të këtij lloji ndaj zonës, duke pretenduar se 92 dronë ishin shkatërruar.
Rafineria e naftës Slavneft-Yanos në Jaroslavl ka qenë më herët objektiv i sulmeve ukrainase, në kuadër të përpjekjeve për të goditur infrastrukturën energjetike ruse.
Ndërkohë, sulmet ruse kanë vijuar në territorin ukrainas. Në qytetin Balakliya, në rajonin e Harkivit, shërbimi shtetëror i emergjencave bëri të ditur se tre persona humbën jetën pasi dronët rusë goditën një zonë banimi. Nga sulmet u shkaktuan edhe zjarre në disa banesa. Sipas autoriteteve ukrainase, 12 persona të tjerë u plagosën në sulmet ajrore ruse në rajonin e Sumit. Ministria ruse e Mbrojtjes deklaroi gjithashtu se gjatë natës kishte goditur dy anije në portin e Odesës, duke pretenduar se ato transportonin ngarkesa ushtarake.
