Mesnatën e së dielës mbyllet afati i aplikimit për subjektet e reja politike për t’u certifikuar për të marrë pjesë në zgjedhjet parlamentare të 7 qershorit.
Zëdhënësi Valmir Elezi tha më herët se certifikimit do t’i nënshtrohen vetëm subjektet e reja siç janë koalicionet, nismat qytetare dhe kandidatët e pavarur, ndërsa përjashtohen partitë politike, që ligji për zgjedhjet e përgjithshme i konsideron të certifikuara automatikisht.
Ndërkaq, 12 maji është afati i fundit që të gjitha subjektet politike të dorëzojnë online në KQZ listën me emrat e kandidatëve me të cilët do të garojnë në zgjedhjet për Kuvendin e Kosovës.
Deri më tani, nga 53 parti politike të regjistruara, 22 prej tyre kanë njoftuar KQZ-në se do të marrin pjesë në zgjedhjet e parakohshme, përfshirë Partinë Socialdemokrate, Lidhjen Demokratike të Kosovës, Aleancën për Ardhmërinë e Kosovës dhe Partinë Demokratike e Kosovës.
Sakaq 9 parti, mes të cilave edhe Nisma Socialdemorkate e Fatmir Limajt njoftuan se nuk do të marrin pjesë, ndërsa janë krijuar edhe 3 koalicione, ku përfshihet Lëvizja Vetëvendosje me aleatët e saj Guxo, Alternativa dhe Partia Shqiptare Demokristiane.
Lëvizja Vetëvendosje zgjpodhi sërish Albin Kurtin si kandidatin e saj për kryeministër, LDK shkon në zgjedhje me Lumir Abdixhikun si kandidat për kreun e ekzekutivit, ndërsa Vjosa Osmanin do të kryesojë listën e kandidatëve për deputetë dhe do të jetë kandidate për Presidente.
Zgjedhje e reja do të mbahen pasi legjislatura e 10-të e dalë nga zgjedhjet parlamentare të 28 dhjetorit nuk arriti të zgjedhë presidentin e ri të vendit, pas mbarimit të mandatit të Vjosa Osmanit.
