Mijëra studentë shqiptarë nga tre universitete të ndryshme zhvilluan një marshim masiv protestues në Shkup, duke i bërë thirrje Ministrisë së Drejtësisë të lejojë zhvillimin e provimit të jurisprudencës në gjuhën shqipe. Nën thirrjet “Drejtësi, barazi, nuk ka shtet pa rini!”, të rinjtë u nisën nga Gjykata Kushtetuese për të përfunduar marshin e tyre përpara godinës së Ministrisë së Drejtësisë.
Kërkesa për zbatimin e ligjit dhe thirrjet për dorëheqje
Boshti i kësaj proteste është zbatimi i Kushtetutës dhe Ligjit për përdorimin e gjuhëve. Përfaqësuesit e studentëve kërkuan gjetjen e një zgjidhjeje urgjente ligjore dhe i bënë thirrje të drejtpërdrejtë ministrit të Drejtësisë, Igor Fillkov, të reflektojë. Pas deklaratave të mëparshme të ministrit se nuk do të lejonte që provimi të mbahej edhe në shqip, protestuesit e përshkallëzuan reagimin e tyre duke kërkuar dorëheqjen e tij të menjëhershme.
Ata paralajmëruan se nuk do të tërhiqen nga rruga e protestave derisa kërkesat e tyre të gjejnë zbatim.
Zëri i studentëve: “Gjuha shqipe nuk negociohet”
Gjatë marshimit, përfaqësues të parlamenteve studentore theksuan se çdo vonesë institucionale shihet si një tentativë për të mohuar një të drejtë thelbësore.
Besar Sejdiu (Kryetar i Parlamentit Studentor, “Nënë Tereza”): “Kolegët tanë kanë të drejtë të japin provimin e jurisprudencës në gjuhën shqipe, pikë! Çdo zvarritje është përpjekje për të na mohuar një të drejtë që na është mohuar prej shumë vitesh. Gjuha shqipe është zyrtare, nuk negociohet! Kërkesa jonë është e thjeshtë: respektojeni Kushtetutën dhe ligjin, as më shumë e as më pak.”
Besjan Rexhepi (Parlamenti Studentor, UEJL): “Ky është një mesazh i drejtpërdrejtë për ministrin e Drejtësisë z. Fillkov, që të marrë seriozisht këtë çështje dhe të reflektojë me zgjidhje konkrete ligjore, jo me vonesa apo heshtje institucionale e deri në injorim të kërkesave tona.”
Mevlan Ademi (Student i Drejtësisë): “Nuk duhej të mendohej që në vitin 2026 studentët të dilnin në rrugë për gjuhën e tyre. Para se të jemi studentë e profesionistë, ne jemi shqiptarë. Ne jemi ata që nesër do të mbrojmë ligjin, por sot kërkojmë të drejtën tonë për gjuhën amtare. Një shtet që nuk zbaton të drejtat e veta, nuk mund të ekzistojë.”
