Studentët e universiteteve publike ishin sërish sot para kryeministrisë për të kundërshtuar reformën klienteliste në favor të privatëve. Por këtë herë edhe një tjetër kërkesë, kundër zhvendosjes së studentëve nga Fakulteti Gjeologji-Minierave. Ndërsa parulla këtë herë ishte, “Kush nuk ka, nuk paguan”.
“Kundër borxhit skllavërues studentor, kundër pushtimit të universiteteve publike nga tregtarë dhe burokratë të korruptuar, kundër përjashtimit të studentëve nga vetëqeverisja universitare, kundër katandisje së infrastrukturës fizike dhe mësimore të shumë fakulteteve publike të lëna në baltë nga një qeveri që investon gjithnjë e më pak në arsim”,- tha një student.
“Protestat tona nuk do kenë të ndalur derisa nga ky fakultet të jetë larguar edhe tentakula e fundit e Ministrisë së Drejtësisë dhe lënia e tij në autonominë e lirë universitare”,- tha një tjetër student.
Pema e krishtlindjeve me kartolina ishin mbyllja e këtij viti protestash për studentët të cilët kishin disa urime për kryeministrin, teksa një helikopter monitoronte protestën e tyre nga ajri.
“Zoti kryeministër, e kemi për detyrë që me anë të kësaj kartoline t’ju urojmë juve dhe kabinetit tuaj suksese në arritjen e prishjes së ëndrrave të studentëve për tu arsimuar në universitetet. Bravo Nikolla, Rama, Çili. Ndjesë pastë Rilindja dhe Rama”, ishte përmbajta e kartolinës.
Por në nisje të protestës nga Korpusi Universitar drejt kryeministrisë studentët janë përballur edhe më kreun e Bashkisë së Tiranës, Erion Veliaj të cilin e kanë cilësuar një turp dhe nuk kanë pranuar të diskutojnë me të. Ja momentet e takimit të Veliaj me studentët.
“Turp, turp, turp”, “Qeveri private, qeveri private”, ishin thirrjet në kor të studentëve.
Janari pritet të jetë muaji i aksioneve për këta studentë të cilët planifikojnë edhe bllokim fakultetesh, bojkotimin e mësimit dhe synim do të kenë referendumin.
Balkanweb
