Një ditë pas protestës së opozitës e shoqëruar me akte dhune ndaj disa institucioneve dhe bunkerit pranë Ministrisë së Brendshme, demokratët po përpiqen ta mbajnë të karikuar ndjenjën e militantëve të tyre për ndryshim.
Madje, deputeti Gent Strazimiri, edhe pse opozita shprehet kundër dhunës ka bërë një deklaratë që mund të përkthehet si mesazh për reagime të tilla.
Ai shkruan në një postim në “Facebook”, se mazhoranca aktuale ka ngritur një “regjim që duhet shporrur dhe jo dialoguar” duke e mbyllur në fund postimin me fjalët “Ngrehuni, Bjeruni”.
Ja postimi i plotë i Strazimirit
Fatmira e Ibrahim Kuka, prindërit e Andi Kukës, të rrahur shtazërisht nga policia në orët e vona të natës së mbrëmshme në shtëpinë e tyre në sy të fëmijëve të mitur! Familje e përbërë prej 9 personash (3 prej të cilëve invalidë) pa asnjë të ardhur!
Pse? Sepse “keni dalë kundër qeverisë në protestë”!
Deputetët e opozitës, avokatët nuk lejohen të takojnë të ndaluarit me sa duket për shkak të shenjave evidente të dhunës!
FASHIZMI I KUQ në veprim! Ky nuk është shtet! Ky tashmë është një REGJIM që duhet shporrur, jo dialoguar!
