Statuti i ri i PS-së e ka lënë sërish në favor të kryetarit nenin ku flitet për largimin e tij. Në dokumentin e ri, që u votua në parim dhe jo nen për nen, në Kongresin e datës 19 mars, pikërisht në pikën 3 të nenit 40, ku saktësohet zgjedhja e kryetarit të partisë, është përcaktuar: “Mandati i tij ndërpritet para kohe kur: jep dorëheqjen, apo kur partia humbet vendin e parë në zgjedhjet e përgjithshme”.
Një pikë e tillë, në statutin e vjetër ishte pikërisht kështu: “Mandati i tij ndërpritet para kohe kur: a. jep dorëheqjen; b. partia humbet në zgjedhjet e përgjithshme legjislative”. Në pikën e dytë të dy neneve ka një ndryshim, por që në rastin aktual i jep më shumë pushtet kryetarit të partisë. Në një rast hipotetik, nëse PS i humb në fakt zgjedhjet përballë një koalicioni të PD-së me LSI apo me koalicionin që ajo mund të formojë, dhe PS ka humbur, por si subjekt ai ajo vijon të mbajë vendin e parë si partia më e votuar, atëherë kryetari nuk e jep dorëheqjen. Me një logjikë të thjeshtë i bie që zgjedhje për kryetarin të mos ketë asnjëherë, as një herë në katër vjet që përcakton statuti.
‘Balkanweb’ raporton se po në këtë pikë të statutit, por pak më poshtë, tashmë përcaktohet edhe zgjidhja që favorizon kreun e PS-së, në këtë rast Edi Ramën, pasi thuhet: “Kur partia është në qeveri dhe kryetari i saj zgjidhet kryeministër, zgjedhjet për kryetarin e partisë zhvillohet vetëm nëse kërkohet nga të paktën 10% e delegatëve dhe kërkesa merr mbështetjen e shumicës së delegatëve të kongresit në votimin që zhvillohet në kongresin vjetor të partisë”.
Largimi i kryetarit të PS
Si ishte
Statuti 2011
Neni 30
2. Mandati i Kryetarit të Partisë është 4 vjet. Mandati i tij ndërpritet para kohe kur:
a. jep dorëheqjen;
b. partia humbet në zgjedhjet e përgjithshme legjislative;
c. humbet në mocionin e mosbesimit të zhvilluar për të me kërkesën e 1/3 së anëtarëve të partisë. Mocioni administrohet nga Komisioni i Zgjedhjeve të Partisë (KZP).
Si bëhet
Statuti 2016
Neni 40
3.Mandati i kryetarit të partisë është katër vjet.
Mandati i tij ndërpritet para kohe kur:
a. Jep dorëheqjen
b. Partia humbet vendin e parë në zgjedhjet e përgjithshme
c. Humbet në mocionin e mosbesimit të zhvilluar për të, me kërkesën e 1/3 së anëtarëve të partisë.
Pika 6
Kur partia është në qeveri dhe kryetari i saj zgjidhet kryeministër, zgjedhjet për kryetarin e partisë zhvillohet vetëm nëse kërkohet nga të paktën 10% e delegatëve dhe kërkesa merr mbështetjen e shumicës së delegatëve të kongresit në votimin që zhvillohet në kongresin vjetor të partisë.
