Banka Qëndrore bën të ditur se, në fund të shtatorit totali i kredisë konsumatore, përfshi overdraftet, arriti në mbi 43 miliardë lekë, me një rritje me 14% që nga fillimi i vitit.
Ekspertet shprehen se rritja e kredisë konsumatore po jep një ndikim pozitiv në përmirësimin e kërkesës së brendshme në ekonomi. Kreditimi eshte një faktor që po fiton peshë në mbështetjen e rritjes ekonomike. Bankat e kanë përqendruara vëmendjen e tyre në veçanti te individët dhe kjo dëshmohet jo vetëm nga rritja e portofolit të kredisë në këtë segment, por edhe nga vrojtimet për standardet e kredisë.
Ndërsa standardet e kredisë për biznesin ngelen të shtrënguara, ato të kreditimit të individëve janë në lehtësim të vazhdueshëm. E njëjta gjë vërehet te normat e interesit. Sipas Bankës së Shqipërisë, interesat e kredive të reja për individët gjatë muajt shtator janë më të ulëta krahasuar me interesat për bizneset, në të gjitha monedhat kryesore.
Kështu, interesi mesatar i kredive të reja në lekë për individët në shtator ishte pak më shumë se 7%, ndërsa për bizneset ishte 10.25%. Në euro, individët u kredituan mesatarisht me një interes 3.74%, ndërsa bizneset me 5.8%. Ndryshimet në normat e interesit reflektojnë një perceptim më të lartë rreziku që ekziston rreth bizneseve dhe që shpjegon standardet më të shtrënguara të kreditimit shkruan ATA.
Megjithatë, ekspertët e Bankës së Shqipërisë janë optimistë se standardet e kreditimit të bizneseve do të lehtësohen, pasi ekonomia reale të ketë hyrë në një rrugë përmirësimi të qëndrueshëm. Sipas ekspertëve, bankat kanë nevojë të shohin një historik të caktuar pozitiv në bilancet e shoqërive private.
Një tjetër faktor, i nënvizuar edhe në deklaratën e politikës monetare, është paketa e masave për uljen e kredive të këqija, ku bizneset mbajnë peshën kryesore. Përmirësimi i kuadrit ligjor dhe rregullator i mbledhjes së kredive të këqija vlerësohet se do të ketë një ndikim të konsiderueshëm në gjallërimin e kreditimit të biznesit./a.m.
