Të pakta kanë qenë deklaratat që pasuan prezantimin e kabinetit të ri “Rama 2” pas së dielës që lamë pas. Megjithatë ka patur një sërë reagimesh nga ata që pritet të largohen pas dekretimit të qeverisë së re, por edhe të zgjedhurit.
Në përfundim të Asamblesë Kombetare ku edhe u komunikua kabineti i ri, interesi kryesor i gazetarëve u fokusua tek ata që largohen dhe që me gjasë pretendonin të merrnin sërish ndonjë dikaster.
Megjithatë, një pjesë e mirë e ministrave aktualë kanë preferuar heshtjen duke vijuar punën. I tillë është rasti i ministres Mimi Kodheli, e cila nuk ka komentuar largimin e saj nga Mbrojtja, por në rrjetet sociale vijon të njoftojë punën e FA-ve sa i përket luftës me zjarret.
Në përfundim të asamblesë, ministrat që mbetën pjesë e kabinetit edhe për mandatin e ardhshëm duket se iu shmangën komenteve për ri-emërim. Arben Ahmetaj iu drejtua gazetarëve vetëm me fjalët: Më lini të kaloj se do të më rrëzoni. Kjo referuar vështirësisë në të ecur pas aksidentit të disa javëve më parë.
Ndërkohë, ambasadori amerikan Donald Lu, ka nisur një sërë letrash në adresat e ministrave që pritet të lënë detyrën ku i falenderon për bashkëpunimin gjatë ushtrimit të detyrës.
Ja përmbledhja e reagimeve të këtyre ditëve pas prezantimit të “Rama 2”, kreut të Kuvendit dhe atij të Grupit Parlamentar të PS:
Të emëruarit
Ditmir Bushati, ministër i Punëve të Jashtme: Është vlerësim për mua dhe besoj një thirrje për përgjegjshmëri më të madhe në ushtrimin e detyrës.
Pandeli Majko, ministër i Shtetit për Shqiptarët Jashtë Kufijve: Jam duke folur në telefon. Ooo jam i lumtur shumë (qesh) më lini të vazhdoj. Do flasim herë tjetër.
Taulant Balla, kryetar i Grupit Parlamentar: Do kemi mundësi të flasim!
Niko Peleshi, ministër i Bujqësisë: Sfidë e re, dimension i ri, agroenergji, ftesë e hapur për këdo që beson njelloj si unë te potenciali i fshatit dhe partneriteti urban-rural. O sot, o kurrë #bujqesiashqiptare #siguriaushqimore
Senida Mesi, Zv.Kryeministër, përmes një postimi në rrjetin social, së pari ka falënderuar ministrin e Jashtëm të zgjedhur sërish deputet në Shkodër, Ditmir Bushatin, por edhe vetë kreun e qeverisë, për besimin që i ka dhënë për postin e ri në kabinetin qeveritar. Ajo ka pohuar se tashmë është koha për të punuar. Ndëkaq, numri dy i qeverisë ka zgjedhur ndër të tjera të ndajë pjesë nga fjalimi madhështor i Gjergj Kastriotit në prag të vdekjes, teksa thekson për ata që duan të dinë më shumë.
Damian Gjiknuri, ministër i Energjitikës dhe Infrastrukturës: Asnjë koment!
Të larguarit dhe pretendentët
Saimir Tahiri, ish-ministër i Punëve të Brendshme: Suksese kolegëve! Rrugë e gjatë përpara.
Eglantina Gjermeni, ish-ministër i Zhvillimit Urban: Nuk jam e zhgënjyer jam e nderuar që kam qënë ministre. I uroj sukses ministrave të rinj.
Milena Harito, ish-ministër Shteti për Inovacionin: Privilegj i jashtëzakonshëm që pata nderin të vë eksperiencën time 20 vjeçare në Francë në shërbim të vendit. Shumë suksese qeverisë “Rama 2” në sfidat drejt.
/JAVANEWS/
