Komiteti Ekzekutiv i FSHF-së ka rikonfirmuar financimin prej dhjetë milionë lekësh për ndërtimin e stadiumit të ri kombëtar në Tiranë. Procesi i nisur nuk solli asnjë zgjidhje të pranueshme, ndaj Shoqëria Kuqezi e mbylli atë dhe kërkon të nis një tjetër proces gare për ndërtimin e stadiumit. Vendimi u mor në mbledhjen e sotme të KE, ku u vendos edhe rritja e pagës së trajnerit të kombëtares, Gianni De Biasi, dhe stafit të tij, propozuar nga presidenti Armand Duka. Po ashtu, Komiteti miratoi edhe shpërblimet për ekipin kombëtar, për kualifikimin në finalet e Euro 2016.
Në ndeshjen e parë të Shqipërisë në Francë, kundër Zvicrës, do të jenë të pranishëm si të ftuar nderi të gjithë lojtarët dhe trajnerët e Shqipërisë në vite. Ata do të jenë të ftuar të Federatës, e cila do të organizojë udhëtimin me çarter, akomodimin në Francë dhe hyrjen në stadium.
