Kryeministri Edi Rama thotë se për konsumatorët familjarë dhe biznesin e vogël do të falen të gjitha kamatvonesat pas krizës për shkak të koronavirusit.
“Biznesi i vogël njësoj si qytetarët ka kamatvonesa dhe të gjitha do të fshihen. 211 mijë persona. Është një barrë shtesë, e cila do të hiqet e gjitha”, sqaron kryeministri në “Opinion” në TvKlan.
Duke sqaruar pikat e planit financiar që u shpall sot, Rama tregoi sesi do të bëhet kompensimi i rrogave të punonjësve që kanë pezulluar punën.
Ai tha se të gjithë do të paguhen aq sa i kanë pasur rrogat e munguara.Por ai ka sqaruar se për ata punonjës të cilëve u është hapur aktiviteti i punës ku kanë qenë dhe nuk shkojnë, nuk do të kompensohen. “Nëse aktiviteti është hapur dhe punonjësit nuk shkojnë në punë, nuk kanë kompensim”, tha ai.
Më tej Rama ka sqaruar procesin e dhënies së kredive që do t’u jepen bizneseve për të kpaluar situatën e krizës nga shpërthimi i koronavirusit, duke i dalë garant shteti deri në 100 milion lekë.
Ai thotë se kjo skemë është e dakordësuar me Guvernatorin e Bankës së Shqipërisë, Gent Sejko dhe nëse do të hasen probleme gjatë rrugës do të rishqyrtohet.
I pyetur, se nëse subjektet marrin kredinë dhe më pas nuk e shlyejnë atë, apo falimentojnë, Rama u shpreh se më pas hyn në fuqi plani B, por pa e sqaruar këtë të fundit se çfarë parashikon.
