Ministrja për Evropën dhe Punët e Jashtme të Shqipërisë, Elisa Spiropali, ka përshëndetur sot konstituimin e Legjislaturës së X-të të Kuvendit dhe formimin e Qeverisë së re të Kosovës, duke ofruar mbështetjen e pakursyer të Tiranës zyrtare për udhëheqjen e re në Prishtinë.
Përmes një reagimi publik, Kryediplomatja shqiptare uroi drejtuesit e lartë të shtetit për marrjen e detyrave të reja, duke veçuar Kryetaren e Kuvendit, Albulena Haxhiu, Kryeministrin Albin Kurti dhe Zëvendëskryeministrin e parë e Ministrin e Jashtëm, Glauk Konjufca.
Në mesazhin e saj, Spiropali theksoi peshën e mandatit të ri qeverisës në shërbim të qytetarëve dhe demokracisë.
“Ju priftë e mbara në këtë përgjegjësi të naltë në shërbim të qytetarëve dhe të forcimit të mëtejshëm të shtetit demokratik të Kosovës,” u shpreh ajo, duke u uruar suksese drejtuesve në këtë kapitull të ri politik.
Ministrja Spiropali e vuri theksin te lidhja e fortë kombëtare mes dy shteteve, duke e cilësuar Kosovën si “pjesë të pandashme të zemrës sonë kombëtare” dhe të horizontit të përbashkët europian.
Ajo garantoi se Shqipëria do të vazhdojë të jetë një mbështetëse e sinqertë dhe e palëkundur e Kosovës. Sipas Spiropalit, kjo mbështetje do të fokusohet në sigurinë e vendit; forcimin e institucioneve; rrugëtimin drejt familjes euroatlantike.
Ky urim vjen në momentin kur Kosova nis një etapë të re me Legjislaturën e dhjetë.
Postimi i Ministres për Evropën dhe Punët e Jashtme, Elisa Spiropali
Rrugëtim të mbarë dhe shumë suksese Kuvendit të Republikës së Kosovës në Legjislaturën e X-të dhe Qeverisë së re! Urimet më të përzemërta për Kryetaren e Kuvendit, Albulena Haxhiu, për Kryeministrin Albin Kurti dhe Zv.Kryeministrin e parë, Ministrin e Punëve të Jashtme, Glauk Konjufca. Ju priftë e mbara në këtë përgjegjësi të naltë në shërbim të qytetarëve dhe të forcimit të mëtejshëm të shtetit demokratik të Kosovës. Kosova është pjesë e pandashme e zemrës sonë kombëtare dhe e horizontit tonë të përbashkët europian. Shqipëria do të qëndrojë gjithmonë pranë Kosovës, me mbështetje të sinqertë dhe të palëkundur për sigurinë, institucionet dhe rrugëtimin e saj drejt familjes euroatlantike. Suksese në këtë kapitull të ri, në shërbim të paqes, zhvillimit dhe dinjitetit të qytetarëve të Kosovës.
