Ministrja e Shtetit për Marrëdhëniet me Parlamentin, Elisa Spiropali ka takuar këtë të martë, Ministrin e Brendshëm të Kosovës, Xhelal Sveçlën.

Spiropali i ka shprehur mirënjohjen Kosovës për mbështetjen në dy fatkeqësi, atë të tërmetit të 26 nëntorit dy vite më parë si dhe për përballimin e situatës së zjarreve në vend.

Gjithashtu ministrja ka takuar dhe Ministrin e Infrastrukturës, Liburn Aliun me të cilin diskutoi marrëveshjet Shqipëri-Kosovë dhe bashkëpunimin e ndërsjellë.

Postimi i Elisa Spiropalit:

Me ministrin e Punëve të Brendshme të Kosovës, z. Xhelal Sveçla dhe ministrin e Mjedisit, Planifikimit Hapësinor dhe Infrastrukturës, Liburn Aliu. Pata rastin ta falenderoj dhe t’i shpreh mirënjohjen ministrit Sveçla në emër të Kryeministrit dhe të qeverisë shqiptare, për ndihmën e menjëhershme dhe të pakursyer të Kosovës në përballimin e tërmetit të 26 nëntorit 2019 si dhe në situatën e krijuar nga zjarret në veri të vendit, si dëshmi se i jemi gjindur e do t’i gjindemi gjithmonë njëri-tjetrit në çdo kohë.

Me ministrin Aliu diskutuam rëndësinë e marrëveshjeve midis qeverisë së Shqipërisë dhe asaj të Kosovës, projektet madhore infrastrukturore dhe bashkëpunimin e ndërsjellë që duhet të vazhdojë intensivisht me të tjera projekte në dobi të të gjithë shqiptarëve.