Integrimi i Shqipërisë në sistemin europian të pagesave SEPA pritet të sjellë një ndryshim të rëndësishëm për qytetarët, bizneset dhe emigrantët shqiptarë. Në një intervistë për Ilva Tare Talks, specialisti i Lartë i Bankës Botërore, Holti Banka, thekson se përfitimet janë konkrete dhe të menjëhershme.
“Ulja është shumë e madhe. Nuk po flasim vetëm nga këndvështrimi i bankave apo bizneseve, por për një ndikim të drejtpërdrejtë tek qytetarët. Në disa raste, kostot mund të ulen deri në 96% dhe madje të afrohen pothuajse me zero,” shprehet Banka.
Ai shpjegon se një nga arsyet kryesore të kostove të larta ka qenë struktura e sistemit të vjetër. “Transfertat bëheshin përmes dy ose tre bankave ndërmjetëse, të quajtura banka korrespondente, të cilat e bënin procesin më të komplikuar dhe më të kushtueshëm,” thotë ai. “Me sistemin e ri, këto hallka eliminohen dhe një bankë në Shqipëri mund të komunikojë drejtpërdrejt me një bankë në Europë.”
Kjo sjell edhe një ndryshim konkret për qytetarët. “Komisionet zbresin në rreth 0.03%, që është shumë i vogël krahasuar me kostot që ekzistonin më parë,” thekson Banka, duke shtuar se për një transfertë tipike, si 500 euro nga emigrantët, shuma që mbërrin tek familjarët është pothuajse e plotë.
Përfitimet nuk janë vetëm individuale, por edhe në shkallë kombëtare. “Këto janë përfitime të drejtpërdrejta për qytetarët dhe bizneset, sepse më shumë para mbeten në xhepat e tyre,” shprehet ai. Sipas vlerësimeve, kursimet mund të arrijnë deri në 130 milionë euro në vit.
Megjithatë, sfidat mbeten. “Shqipëria ka bërë progres në 4–5 vitet e fundit në përdorimin e sistemit bankar, por ende ka shumë rrugë për të bërë për të arritur nivelet europiane,” thekson Banka, duke shtuar se “nuk duhet të humbasim kohë”, pasi besimi në sistemin financiar duhet të forcohet.
Ky zhvillim shihet si një hap i rëndësishëm drejt modernizimit të ekonomisë shqiptare dhe afrimit me standardet e Bashkimit Europian.
