Spanja ka mbyllur hapësirën e saj ajrore për avionët amerikanë të përfshirë në sulmet ndaj Iranit, një hap përtej refuzimit të mëparshëm për përdorimin e bazave ushtarake të përbashkëta, raportoi të hënën gazeta El País, duke cituar burime ushtarake.
Mbyllja e hapësirës ajrore, e cila detyron avionët ushtarakë të shmangin vendin anëtar të NATO-s gjatë rrugës drejt objektivave në Lindjen e Mesme, nuk përfshin situatat emergjente, shton më tej raportimi. Ministria spanjolle e Mbrojtjes nuk iu përgjigj menjëherë një kërkese për koment.
“Ky vendim është pjesë e qëndrimit të marrë tashmë nga qeveria spanjolle për të mos marrë pjesë dhe për të mos kontribuar në një luftë që është nisur në mënyrë të njëanshme dhe në kundërshtim me të drejtën ndërkombëtare,” tha ministri i Ekonomisë, Carlos Cuerpo, gjatë një interviste për radion Cadena Ser, kur u pyet nëse ky vendim mund të përkeqësojë marrëdhëniet me Shtetet e Bashkuara.
Kryeministri spanjoll, Pedro Sánchez, ka qenë një nga kundërshtarët më të zëshëm të sulmeve të SHBA-së dhe Izraelit ndaj Iranit, duke i cilësuar ato si të pamatura dhe të paligjshme.
Presidenti amerikan Donald Trump ka kërcënuar se do të ndërpresë marrëdhëniet tregtare me Madridin për shkak të refuzimit të Spanjës për t’i lejuar SHBA-së përdorimin e bazave të saj në këtë luftë.
