Qeveria e kryeministrit spanjoll Pedro Sanchez pësoi një humbje në Parlament, pasi deputetët rrëzuan dy dekretet emergjente për strehimin që synonin të përballonin krizën e banesave në vend.
Dekreti i parë u rrëzua me 178 vota kundër dhe 172 pro, ndërsa i dyti me 184 vota kundër dhe 166 pro. Vendimtare rezultuan votat e partisë katalanase Junts de Catalunya, e udhëhequr nga Carles Puigdemont, e cila kishte paralajmëruar më herët se do të votonte kundër.
Pas këtij votimi është shtuar presioni ndaj Sanchez për të shpallur zgjedhje të parakohshme, me 29 nëntorin që po përmendet si data e mundshme.
Ndërkohë, mijëra protestues vijojnë të jenë të mbledhur në sheshin Puerta del Sol në Madrid. Komiteti i qiramarrësve, që drejton protestat, ka thirrur manifestime të njëkohshme më 3 tetor në Madrid dhe në 22 qytete të tjera të Spanjës.
Në fjalën e tij në Parlament, Sanchez mbrojti dekretet duke thënë se ato nuk përmbanin “asnjë ekstremizëm” dhe u bëri thirrje deputetëve të mendonin për familjet që përballen me rritjen e qirave.
Nga ana tjetër, Partia Popullore, forca kryesore e opozitës, argumentoi se kriza e strehimit nuk zgjidhet me dekrete, por me ndërtimin e banesave të reja.
Sipas qeverisë PSOE-Sumar, dekretet synonin të frenonin spekulimet në tregun e pasurive të paluajtshme, zgjerimin e qirave turistike dhe dëbimin e personave në nevojë nga banesat, ndërsa një nga masat më të debatuara ishte rinovimi automatik dhe pa afat i kontratave të qirasë.
