Nga Drini Kuqo*
Harrojini programet, qëllimet, premtimet, krahasimet apo zotimet për ndryshim.. diskursi i tre javëve të fundit përpara votimeve rrezikon të ngurtërohet tek kartat e identitetit të 18-vjeçarëve.
Një rastësi kafkiane bën që zgjedhjet e 25 qershorit të përkojnë këtë herë edhe me dy ngjarje të tjera madhore, e para është Kurban Bajrami, ndërsa e dyta provimet e Maturës, dita më e rëndësishme e jetës së rreth 40 mijë votuesve të herës së parë.
Të vendosur përballë kësaj sprove potencialisht jetëshkruese, shumë të rinj mund të ndihen të joshur nga oferta e LSI për t’i dhënë dorë: pyetjet në këmbim të ID-ve.
Një votë për një provim, pavarësisht sa moralisht i baltosur, është një propozim që mund të gjejë shumë dishepuj tek ajo masë të rinjsh pragmatistë, të ç’interesuar për politikën.
Fatmirësisht, janë të paktën tre pengesat e pakapërcyeshme që e bëjnë këtë ofertë të ngjasojë si dy pika uji me spamet e emaileve tona, me atë botë përrallash me mbret ku mund të fitosh një milionë dollarë me një klikim të vetëm.
Pengesa e parë ndaj këtij plani është qartësisht ajo politike. Supozojmë për një moment sikur të gjithë filtrat mbrojtës të dështojnë dhe maturantët të marrën pyetjet e tyre. Rezultatet habitshmërisht të larta do të tregonin qartë përmasën e trukimit dhe siç ndodhi në konkursin e juridikit në 2005-n, në 2008-n e po ashtu si herë të tjera, konkursi thjesht do të anullohej për të gjithë e do të përsëritej sërish.
Pengesa e dytë është ajo teknike. Provimet e maturës hartohen vetëm disa orë përpara se të mbahen, nga një komision i rastësishëm, emrat e studentëve janë të sekretuar, vlerësimi del nga skanimi që bën automatikisht një kompiuter, e asnjë mjet teknologjik nuk mund të mbahet në klasë. Aq e vështirë është bërë të kopiosh, sa që një vit më parë rreth 25% e maturantëve ngelën. Dhe të mos harrojmë, Ministria dhe komisionet kontrollohen nga Partia Socialiste, e interesuara numër një që të mos ketë asnjë manipulim.
E treta, është rezistenca e vetë maturantëve. Shumë prej të rinjve me rezultate të mira, do të jenë të parët që do të sabotojnë një ofertë të tillë, sado e vagullt ajo qoftë. Kush nga prindërit apo nga të rinjtë që kanë derdhur djersë për 12 vite me radhë, do të donte të shihte ngelësin e klasës në piedestal, përpara tij. Ndaj, edhe sikur të ndodhë, është praktikisht e pamundur që ky inskenim të kalojë pa ngjallur revolta të tilla, që do të kthenin përmbys të gjithë procesin.
Le të rikthehemi tek ajo që ndodhi sot, tek denoncimi ndaj LSI për përgatitjen e kësaj çorbe me maturantët. Janë 40 mijë ata që do të votojnë, një “armatë” e tërë votuesish që kjo forcë synon të joshë. E megjithatë, kjo përçapje e diskretituar pa u ngjizur mirë, duket se do të përfundojë si të gjithë emailet junk, ku një pseudobankier i ndodhur mijëra kilometra larg, të premton një milionë dollarë në këmbim të kartës së identitetit… Ky është spami i LSI në emailet e maturantëve.
