Spalletti e kërkon një mbrojtës në afatin kalimtar të janarit. Nëse do të kishte përfunduar me 3 pikë në favor, ndeshja si mysafirë kundër Fiorentinës, do t’i jepte frymëmarrje kampionatit dhe titullit që shpresojnë zikaltërit, por në të vërtetë e përkeqësoi gjendjen e milanezëve. Në më pak se një muaj kanë ndryshuar shumë gjëra në kampin e Interit.
Në 9 Dhjetor formacioni i trajnerit Spalletti përballej me Juventusin si lider i Serie A. Por në 5 ndeshjet e fundit ka një ritëm të denjë për ekipet që zbresin nga kategoria. Probleme fizike, teknike dhe psikologjike janë verifikuar nën pemën e Krishtlindjeve. Barazimi në Firence është i treti në 5 ndeshjet e fundit për zikaltërit, që veç tyre kanë regjistruar dhe disfatat ndaj Udineze dhe Sassuolo. 3 pikë, 5 gola të pësuar dhe vetëm dy të shënuar, që të dy nga Icardi.
Këto numra dëshmojnë mangësi te një skuadër që ka objektiv rikthimin në Ligën e Kampioneve, e që ende e quan të realizueshme, ëndrrën për titullin. Luciano Spalletti dëshiron lojtarë në afatin kalimtar të janarit dhe këtë e ka thënë haptazi pas barazimit 1:1 me Fiorentinën. “Transferime në janar?
Më keni pyetur 100 herë. Edhe nëna ime 80 vjeçare e di se po më mungon një mbrojtës”, u shpreh Spalletti. Dëmtimet e D’Ambrozio dhe Miranda kanë minimizuar çdo siguri në mbrojtjen e Interit. Merkata e janarit duket si një fije shprese për zikaltërit, por me kufizimet e bilancit të imponuara ndaj pronarëve, duket se rikthimet e huazimeve janë zgjidhja e vetme te Inter, përgatiti ”Gazeta Express”. (b.an)
