SPAK ka ‘goditur’ sërish brenda organeve të vettingut. Report Tv mëson se me akuzën e falsifikimit të dokumenteve dhe deklarimit të rremë Prokuroria e Posaçme ka marrë të pandehur komisioneren e Komisionit të Pavarur të Kualifikimit, Etleda Çiftja.
Çiftja bëhet e treta që del para bankës së të akuzuarve pas gjyqtarëve të Kolegjit të Posaçëm të Apelimit, Luan Daci dhe Ardian Hajdari. Ashtu siç ka ndodhur më herët me 2 rastet e para, edhe për Komisioneren e KPK pritet që të merret masa e pezullimit nga detyra.
Etleda Çiftja
Kujtojmë se në muajin shkurt, pak ditë pasi u mor i pandehur nga SPAK, anëtari i Komisionit të Posaçëm të Apelimit (KPA), Ardian Hajdari është pezulluar nga detyra. Vendimi është marrë në mbledhjen e Gjyqtarëve. Hajdari është kallëzuar penalisht në qershor 2020 nga ish-magjistratët Antoneta Sevdari, Elsion Sadiku dhe Ervin Metalla.
I njëjti kallëzim është bërë edhe për i ish-anëtarin tjetër të KPA-së, Luan Daci, i cili tashmë ka marrë dënimin nga GJKKO dhe më pas u shkarkua nga detyra. Ai u dënua me 6 muaj burg konvertuar në një vit shërbim prove dhe kushtin që mos ushtrojë funksione publike.
g.kosovari
