Rrugët e Beogradit u mbushën me brohoritje, flamuj dhe festime, pasi presidenti i Serbisë, Aleksandar Vuçiç, pranoi humbjen përballë lëvizjes së drejtuar nga studentët. Pas gati dy vitesh protestash kundër pushtetit, mijëra qytetarë dolën në rrugë për të festuar atë që e konsiderojnë një kthesë historike për vendin.
Makina që u binin borive, njerëz që përqafoheshin dhe qytetarë që përshëndesnin efektivët e policisë shënuan atmosferën e festës në kryeqytetin serb. Për shumë protestues, momenti kishte një domethënie të veçantë, pasi po festonin pikërisht në rrugët ku më parë ishin përballur me ndërhyrjet e policisë.
“Është shumë e çuditshme që në të njëjtat rrugë ku policia na rrihte, në rrugët ku jemi tërhequr shumë herë përballë xhandarmërisë, tani po qëndrojmë si fitimtarë”, u shpreh Sara, 24 vjeçe, duke përshkruar ndryshimin që ka përjetuar lëvizja studentore.
Sipas rezultateve paraprake të cituara nga Vuçiç, Lista e Studentëve mund të ketë siguruar nga 135 deri në 140 vende në parlamentin me 250 deputetë, ndërsa Partia Progresiste Serbe (SNS), e krahut të djathtë, rreth 105 vende.
Lajmi për humbjen e mundshme të partisë në pushtet nxori mijëra qytetarë edhe në Novi Sad, qyteti ku nisën protestat në nëntor të vitit 2024, pas shembjes vdekjeprurëse të çatisë së një stacioni hekurudhor.
Në Beograd, dhjetëra mijëra njerëz mbushën bulevardet kryesore, duke valëvitur flamuj, ndezur flakadanë dhe brohoritur për ndryshimin. “O Zot, nuk di si ta shpjegoj. Jam shumë e lumtur dhe e emocionuar”, tha Tamara, 35 vjeçe.
Ajo e cilësoi rezultatin si një hap drejt “lirisë dhe shpresës për një të nesërme më të mirë”, por pranoi se rruga përpara do të jetë e vështirë. “E di që kemi një periudhë të vështirë përpara, e di. Por, pavarësisht kësaj, është një lehtësim i madh dhe na jep energji për të vazhduar”, u shpreh ajo.
Sfidat e lëvizjes së re
Detyra për të frenuar prirjet autoritare dhe për të luftuar korrupsionin e rrënjosur në vend i takon listës me 250 kandidatë. Mbi 160 prej tyre kanë tituj doktorature, ndërsa në listë përfshihen edhe fermerë, sportistë dhe përfaqësues të profesioneve të tjera.
Megjithatë, sfidat janë të shumta. Programi i studentëve nuk ka marrë një qëndrim përfundimtar për disa prej çështjeve më të debatueshme në Serbi. E ardhmja e anëtarësimit në Bashkimin Evropian është lënë për t’u vendosur përmes referendumit, ndërsa Kosova vazhdon të pretendohet si pjesë integrale e Serbisë.
Pavarësisht pikëpyetjeve për të ardhmen, shumë qytetarë festuan atë që e shohin si fundin e një qeverisjeje të akuzuar për kërcënime të vazhdueshme ndaj kritikëve dhe kufizim të lirisë së medias.
“Populli ka fituar! Populli e mundi diktatorin! Populli do ta drejtojë Serbinë!”, deklaroi Nebojsha Çosiç për Reuters, ndërsa qytetarët u kapën për krahësh dhe kërcyen vallen tradicionale serbe, Kolo.
Festuesit iu drejtuan edhe parkut qendror të Beogradit, ku mbështetësit besnikë të Vuçiçit kishin ngritur një kamp prej më shumë se një viti. Qytetarët hoqën me entuziazëm gardhet dhe tendat që kishin bllokuar hyrjen në park.
Për Duško Suvajac, 52 vjeç, rezultati ka një domethënie që shkon përtej kufijve të Serbisë, në një kohë kur në disa vende po zhvillohen zgjedhje vendimtare, ku përballen forcat e së djathtës autoritare dhe ato pro demokracisë.
“Ky është një simbol për Evropën dhe botën. Është një demonstrim se si liria mund ta mposhtë të keqen”, tha ai.
Teksa fliste, njerëzit përreth tij përqafoheshin, putheshin, qanin dhe bërtisnin nga gëzimi. Për shumë prej tyre, ky ishte një moment i veçantë për të rimarrë rrugët ku thirrjet studentore për ndryshim ishin përballur me policinë, shkopinjtë e gomës, gazin lotsjellës dhe madje edhe përdorimin e dyshuar të një pajisjeje zanore për shpërndarjen e turmave.
“Është thjesht momenti kur ëndrra jonë bëhet realitet”, tha Sara. “Këtë çast do ta kujtojmë për gjithë jetën.”
