Drejtori i Policisë së Tiranës, Elton Alushi, tha se Drejtoria e Përgjithshme e Policisë së Shtetit po përgatit përgjigjen për Prokurorinë e Posaçme në lidhje me mungesën e forcave të rendit në tubimin e organizua nga mbështetësit e Kryetarit të Bashkisë Erion Veliaj, teksa po vlerësohej masa e sigurisë e dhënë për të, shkruan A2 CNN.
“Përgjigja po përgatitet nga Drejtorja e Përgjithshme e Policisë, do t’iu dërgojmë shkresë sapo ajo të dërgohet”, tha Alushi në një konferencë për mediat teksa po raportonte për një aksion antidrogë në kryeqytet.
SPAK tha se i kishte kërkuar përmes një shkrese zyrtare Ministrisë së Brendshme, që të vendosë para përgjegjësisë personat që penguan Policinë e Shtetit që të vepronte për të ruajtur rendin dhe sigurinë gjatë tubimit të mbështetësve të kryebashkiakut.
Gjykata e Posaçme e ka quajtur të paprecedentë sjelljen e Policisë së Shtetit, në rastin e protestës së organizuar nga mbështetësit e Kryetarit të Bashkisë, Erion Veliaj, para godinës së saj, teksa brenda zhvillohej seanca për vlerësimin e masave të sigurisë. Gjykata e Posaçme thotë se nga ana e Gardës së Republikës është kërkuar vazhdimisht mbështetje nga Policia e Shtetit për të garantuar rendin dhe sigurinë para godinave të Gjykatës dhe të SPAK-ut, por ka hasur në mosreagim të Policisë së Shtetit.
I pyetur lidhur me veprimet e Policisë së Shtetit, ministri i Brendshëm, Ervin Hoxha, tha se policia nuk ndërhyri për të shpërndarë mbështetësit e Kryetarit të Bashkisë, pasi, sipas tij, ata ishin simpatizantë, shkruan A2 CNN. “Aty ka një shërbim të planifikuar dhe planëzuar. Kjo është detyrë që e bën çdo ditë. Edhe në raste të tjera ka pasur tubime të lajmëruara në formën e protestave. Ata ishin simpatizantë. Policia e Shtetit merr masat për të siguruar Prokurorinë e Posaçme. Ata patën vështirësi pasi aty pati një grumbullim të papritur të simpatizantëve, jo protestues”, tha Hoxhaj para se të futej në Parlament të enjten e kaluar.
Qindra mbështetës të Erion Veliajt, mes tyre edhe artistë e sportistë të famshëm në vend, u mblodhën para godinës së Gjykatës së Posaçme dhe qëndruan aty deri në dhënien e vendimit për masat e sigurisë ndaj kryebashkiakut Veliaj, bashkëshortes së tij, Ajola Xoxa, dhe biznesmenëve të akuzuar si të përfshirë në një skemë korruptive. Veliaj dhe Xoxa akuzohen edhe për pastrim parash dhe fshehje pasurie.
Ndaj kryetarit të Bashkisë Tiranë u konfirmua masa e sigurisë arrest me burg, ndërsa ndaj bashkëshortes së tij u dha një masë më e zbutur sigurie, nga arrest në shtëpi në detyrim paraqitje.
