Avokati Alban Daci ishte këtë të martë i ftuar për një intervistë në Euronews Albania tha se të humbasë besimin te SPAK do të thotë të mos kesh më arsye për të ndejtur në këtë vend. Sipas tij opozita i del kundër SPAK-ut dhe e sulmon atë pasi e di që shumë shpejt SPAK do të kthehet nga opozita.
Ai tha se partitë opozitare, kanë bashkëpunuar me atë që ka qenë në qeveri gjatë 32 viteve dhe kanë ndihmuar njëri tjetrin, e gjithashtu tha se në Shqipëri kanë qenë gjithnjë të pandarë politika nga biznesi dhe krimi, ndaj nëse nuk është më reforma në drejtësi atëherë nuk ka shpresë për shkëputjen e këtyre hallkave nga njëra-tjetra.
“Sulmet ndaj SPAK janë sulme halli, vijnë për qëllime politike. Problemi më i madh i kësaj opozite është se SPAK-u do të kthehet në një “boomerang” të madh edhe për opozitën. Ata nuk kanë ardhur sot në pushtet. Do përballen me drejtësinë edhe ata se kanë 32 vite që janë pjesë e këtij pushteti ku politika bizensi, nisma e lirë, para dhe krimi janë në një marrëdhënie simbiotike së bashku.
Politika garanton imunitetet e tyre dhe ata sponsorizojnë politikën, nëse nuk ndahen këto hallka, Shqipëria është për fat të keq një kënetë e madhe në të cilën qytetarët e thjeshtë që duan të jetojnë në mënyrë dinjitoze, ose jetojnë në kushte skllavërie ose detyrohen të largohen si e vetmja mundësi për të gëzuar të drejtat themelore të tyre”,-tha për Euronews Albania Alban Daci.
/a.r
