Rreth 100 mijë protestues, mes të cilëve shqiptarë, maqedonas, diplomatë dhe eurodeputetë, u bënë pjesë e thirrjes së opozitës për të protestuar ndaj qeverisë së Nikola Gruevskit në Shkup.
Nën kërkesën për të larguar kryeministrin Gruevksi, thirrjes iu përgjigjen pa dallim kombësie feje apo kulture, qytetarë të Maqedonisë por edhe figura të njohura publike të ardhur nga vende të ndryshme, si ish-kryeministri bullgar Sergej Stanishev
Forca të shumta policie kanë rrethuar sheshin kryesor të Shkupit me qëllim parandalimin e përshkallëzimit të protestës, edhe pse siç është thënë më herët ajo do të jetë paqësore. Policia siç raportojnë mediat maqedonase kanë bllokuar edhe valët telefonike për arsye sigurie.
Të shumta janë banderolat dhe pankartat që mbajnë shqiptarët dhe maqedonasit, duke treguar se mes tyre nuk ka konflikt etnik, por se është diçka e sajuar nga qeveria.
Por pjesë e banderolave janë bërë edhe dy liderët politikë shqiptarë, Menduh Thaçi dhe Ali Ahmeti, lidhur me reagimin e munguar të tyre për aksionin policor në tokën e banuar nga shqiptarët në Kumanovë.
Duke i ironizuar në banderolë shihen karikaturat e dy liderëve shqiptarë, ku Thaçi i drejtohet Ahmetit: “I mbytëm shqiptarët dhe akoma po na besojmë”. Ndërkohë vjen edhe përgjigja e Ahmetit: “Ne jemi mbretër”.
Sot protestë në Shkup, eurodeputetë e mijëra shqiptarë kundër Gruevskit
Tensioni në Maqedoni pritet që sot të arrijë kulmin e saj, në një protestë masive të thirrur nga opozita në Shkup për largimin e qeverisjes aktuale të kryeministrit Nikolla Gruevski.
Mijëra aktivistë dhe simpatizantë të partive opozitare maqedonase, përfaqësues dhe përkrahës të shoqërisë civile maqedonase dhe shqiptare, qytetarë të komuniteteve të ndryshme kanë paralajmëruar pjesëmarrjen në këtë protestë që nis në orën 14:00. Jo vetëm kaq, por në këtë protestë priten edhe mijëra shqiptarë që pas ngjarjes së fundit në Kumanovë, ndërsa edhe eurodeputetë dhe ambasadorë kanë paralajmëruar pjesëmarrjen e tyre.
Kaq i madh është numri aq sa drejtues lokalë të opozitës kanë theksuar se kanë probleme dhe pengesa në transportimin e protestuesve drejt Shkupit.
Protesta nis para Qeverisë, ndërsa lideri i opozitës, Zoran Zaev, ka theksuar se nuk do tërhiqen nga protestat dhe se do të qëndrojnë të ngujuar para Qeverisë deri në dorëheqjen e kryeministrit Nikola Gruevski.
Forca të mëdha policore kanë shtuar masat e sigurisë për protestën, ndërsa edhe opozita maqedonase ka bërë të gjitha përgatitjet për të siguruar mbarëvajtjen e protestës.
Ndërkohë, partia në pushtet VMRO-DPMNE, për të hënën ka paralajmëruar një kundërprotestë, e cila ka në shënjestër opozitën dhe, siç thuhet, “tentimin e saj për të destabilizuar vendin”.
