Partia Demokratike e Shqipërisë ka thirrur për sot, më 17 prill, protestën e radhës në bulevardin “Dëshmorët e Kombit”, përpara godinës së Kryeministrisë. Tubimi pritet të nisë zyrtarisht në orën 19:00 dhe të zgjasë deri në orën 22:00.
Kreu i PD-së, Sali Berisha, pritet t’u drejtohet mbështetësve me një fjalim nga podiumi në shesh, pasi fillimisht do të mbërrijë në selinë e partisë dhe më pas do t’i bashkohet protestuesve.
Ndryshe nga disa tubime të mëparshme të zhvilluara në formë lëvizjeje nëpër kryeqytet, kjo protestë rikthen formatin klasik me fjalime në bulevard.
Në një konferencë për mediat të organizuar para tri ditësh, i pyetur mbi protestën e sotme, Berisha tha se: “Do të jetë një revoltë e fuqishme e qytetarëve shqiptarë në mbrojtje, në mbrojtje të interesave të tyre më jetike, luftës kundër korrupsionit, shtetit ligjor, mbrojtjes nga vjedhjet e Edi Rama dhe qeveritarë, në mbrojtje të vokacionit të tyre perëndimor, por edhe të gjendjes së tyre nga katastrofa ekonomike që po ndodh.”
Mes të tjerash, ai e quajti kryeministrin Edi Rama “armik” të popullit shqiptar.
Një ditë më parë, Policia e Tiranës bëri të ditur se ka marrë masa të posaçme për mbarëvajtjen e protestës dhe ka kërkuar nga organizatorët të shmangin çdo veprim që cenon sigurinë dhe rendin publik.
Gjithashtu, për shkak të tubimit, do të ketë kufizime të qarkullimit në disa akse kryesore të kryeqytetit.
Rrugët e bllokuara:
Nga ora 15:00 e datës 17 prill deri në përfundim të protestës, do të bllokohet lëvizja e automjeteve në bulevardin “Dëshmorët e Kombit” nga kryqëzimi pranë Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Ndërkohë, që nga mbrëmja e kaluar, është ndaluar parkimi dhe qarkullimi në segmentin e bulevardit “Dëshmorët e Kombit” nga “Ura e Dajtit” deri në rrugën “Ismail Qemali”, deri në përfundim të tubimit.
