Protesta e opozitës eshte thirrur sot në një kohë që Parlamenti do të zhvillojë një seancë të jashtëzakonshme në lidhje me ngritjen e një komisioni hetimor për shkarkimin e Presidentit, Ilir Meta.
Por përmes një urdhri, kryetari i Parlamentit, Gramoz Ruçi, ndryshoi axhendën e Kuvendit duke spostuar me një orë seancën e ditës së sotme.
Ndryshe nga sa ishte parashikuar, seanca e sotme do të zhvillohet në orën 17:00 dhe pritet që brenda orës 19:30 të ketë përfunduar.
Partia Socialiste do të zhvillojë sot 120 minuta debat parlamentar në lidhje me një raport të Komisionit të Ligjeve për shkarkimin e Presidentit Meta.
Pritet që shumica qeverisëse të votojë ngritjen e një komisioni hetimor që do të marrë në shqyrtim 9 shkeljet kushtetuese të konstatuara nga Komisioni i Ligjeve dhe më pas të finalizojë me votë shkarkimin e kreut të shtetit.
Në krye të komisionit hetimor për shkarkimin e kreut të shtetit pritet që të jetë kryetari i Komisionit të Ligjeve, Ulsi Manja. Komisioni do ketë në përbërje të tij 9 anëtarë, 5 nga PS dhe 4 nga opozita e re.
Ndërkohë që pritet për t’u parë si do të veprojë grupi demokrat i drejtuar nga Rudina Hajdari. Ajo kërkoi pak ditë më parë shtyrjen e ngritjes së komisionit deri në ngritjen e Gjykatës Kushtetuese për të shmangur pështjellimin e krizës politike, që më shumë e shikon si konflikt personal Rama-Meta.
g.kosovari
