Komisioni i Posaçëm për reformën në drejtësi do të mblidhet sërish sot dhe në fokus të diskutimeve do të jenë propozimet e ekspertëve për Vettingun.
Anëtarët e Komisionit të Posaçëm do të njihen me propozimet e ekspertëve të reformës lidhur me vërejtjet e EURALIUS dhe OPDAT mbi opinionet e PD-së mbi ligjin për rivlerësimin e gjyqtarëve dhe prokurorëve ose siç njihet ndryshe Vettingu.
Gjithashtu në mbledhje pritet që të diskutohet edhe ligji për organizimin e gjyqësorit dhe Strukturën e Posaçme Anti Korrupsion.
Kjo mbledhje pritet që të përcaktojë nëse do të ketë seancë plenare këtë javë për votimin e ligjit për rivlerësimin e gjyqtarëve dhe prokurorëve, mungesa e të cilit bëri të pamundur hedhjen e shortit për ngritjen e institucionit të Këshillit të Emërimeve në Drejtësi.
Ndërkohë, nesër kryetari i Kuvendit ka kërkuar mbledhjen e Konferencës së Kryetarëve të grupeve parlamentare për caktimin e një date për mbledhjen e jashtëzakonshme të Kuvendit për miratimin e 7 ligjeve që shoqërojnë ndryshimet kushtetuese të Reformës në Drejtësi.
Kuvendi ka dy data në dispozicion për thirrjen e seancës 25 dhe 29 gushtin./ shqiptarja.com/a.k
