Sot është dita e fundit e fushatës elektorale për zgjedhjet parlamentare të 25 Prillit. Dy forcat më të mëdha politike në vend do të mbajnë tubimet e fundit elektorale përpara mbështetësve të tyre, ndërsa dita e nesërme është heshtje zgjedhore dhe nuk lejohen aktivitetet politike.
Mësohet se kryesocialisti Edi Rama, njëherësh dhe Kryeministër, do të përmbyllë fushatën pasdite në qytetin e Vlorës, aty ku dhe kandidon për deputet njësoj si në zgjedhjet e kaluara. Rama kandidon për deputet edhe në Durrës, e për këtë arsye besohet se do të bëjë një ndalesë edhe në këtë qytet përpara se të shkojë në Vlorë.
Ndërsa nga kampi tjetër nuk ka surpriza. Partia Demokratike dhe lideri i saj Lulzim Basha do ta mbyllin fushatën elektorale në Tiranë, sikurse ka ndodhur dhe zgjedhjet e kaluara. Përmbyllja e fushatës së PD do të bëhet në sheshin “Nënë Tereza” rreth orës 19:00.
Kujtojmë se Partia Socialiste e mbylli fushatën elektorale në Tiranë ditën e djeshme në një miting në sheshin “Skënderbej”.
/a.r
