Shqiptarët anembanë botës festojnë sot 103-vjetorin e Pavarësisë së Shqipërisë. Ashtu si përherë, kryeqendra të festimeve është qyteti i flamurit Vlora dhe kryeqyteti i shqiptarëve Tirana.
Edhe këtë vit, politika shqiptare feston e ndarë.
Me demokratët që festojnë po sot edhe ditën e Çlirimit nga pushtuesit nazi-fashistë, dhe socialistët që njohin 29-nëntorin si ditën e Çlirimit, ditë e cila njihet edhe zyrtarisht.
Krerët më të lartë të shtetit, Presidenti i Republikës Bujar Nishani, Kryeministri Edi Rama, zv.Kryetarja e Parlamentit, Valentina Leskaj dhe anëtarë të kabinetit qeveritar, ishin të pranishëm në orën në ceremoninë e ngritjes së flamurit në Sheshin e Flamurit në Vlorë që u mbajt në orën 10.00.
Ndërkohë, në të njëjtën kohë kur krerët e shtetit festonin Pavarësinë në Vlorë, opozita, e cila feston sot edhe Çlirimin nga pushtuesit nazi-fashistë, zhvilloi homazhe në varrezat e dëshmorëve në Tiranë. Kryeopozitari Lulzim Basha, ish-kryemisnitri Sali Berisha, deputetë, këshilltarë të djathtë të bashkisë Tiranë dhe mbështetës të opozitës u përulën para memorialit të dëshmorëve.
Aktivitete për Festën e Flamurit po zhvillohen edhe në trevat shqiptare në Kosovë, Maqedoni, Luginën e Preshevës, Mal të Zi dhe në diasporë.
