Nisma më e fundit e qeverisë “Rama 2” është që të eliminohen sorollatjet apo shpenzimi i parave për të marrë disa dokumente që gjithsecilit prej nesh mund t’i duhen. Në konferencën për shtyp të ditës së djeshme Rama tha se ka marrë masa për të sistemuar këtë pjesë të administratës. Pensionistët sidomos nuk do të kenë më arsye të bëjnë as edhe një metër rrugë për të marrë një dokument që u nevojitet.
Këto shërbime tashmë i ofron shteti përmes portalit online “e-Albania” dhe që duhet t’i nxjerrë në moment sapo qytetari i kërkon. Kreu i qeverisë theksoi se heqja e burokracive të tilla shkurton 56 vjet pritje të qytetarëve për të marrë dokumente.
Pra shkurt dhe qartë qytetarët nuk do të paguajnë më asnjë qindarkë për dokumentet. Sepse sipas Ramës çdo punonjës e ka për detyrë ta nxjerrë atë vetë nga faqja online “e-Albania”. “Nuk kanë nevojë që pensionistët të ambientohen me faqen online. Ata thjesht nuk duhet të paraqesin më vërtetimin e pensionit kur t’u kërkohet. Edhe nëse ndodh që e kërkojnë, ata duhet t’i thonë punonjësit ta gjejë vetë, sepse e ka për detyrë”, tha Rama.
Edhe ministri i Financave Arben Ahmetaj ka urdhëruar institucionet e varësisë që të mos i kërkojnë këto dokumente.
Konkretisht më poshtë keni të gjithë dokumentet që nuk ju duhen më dhe nuk do t’jua kërkojë njeri:
-Vërtetim pensioni
-Vërtetimi i pronësisë
-Certifikatë familjare
-Certifikatë personale
-Çdo dokument që lidhet me gjendjen civile
-Karta e shëndetit
-Vërtetime për automjetet
-Autorizimet për rifitimin e lejes së drejtimit
-Vërtetime për lejen e drejtimit
-Kopje e kartës së pasurisë
-Kopje e fragmentit të kartës kadastrale
-Ekstraktin historik të kompanisë
-Vërtetimin për pagimin e kontributeve nga subjekti
-Vërtetimin për përgjegjësitë tatimore
– Vërtetim për regjistrin e investitorit
-Vërtetim për pagim detyrimesh
-Vërtetim për individë të paregjistruar
-Vërtetim status aktiv, përfshirë datën
-Vërtetim xhiro për tre vitet e fundit
-Vërtetim për pagimin e kontributeve për individin
-Autorizime nga drejtoria e përgjithshme e doganave.
a.ç
