Policia e Elbasanit ka ndërmarrë një plan masash për sigurimin e rendit dhe qetësisë publike gjatë ndeshjes Shqipëri-Islandë, mbrëmjen e sotme në ‘Elbasan Arena’.
Uniformat blu informojnë se për mbarëvajtjen e ndeshjes do të angazhohen 215 forca të Policisë së Rendit, Qarkullimit, Shqiponjat, FNSH-ja dhe Policia Kriminale.
Aksi në drejtim të stadiumit do bllokohet duke filluar nga ora 18:00 deri në përfundim të aktivitetit sportiv, si dhe do mbyllen lokalet rreth stadiumit.
“Të gjithë tifozët do të kontrollohen në hyrje të stadiumit nga forcat e Policisë dhe nuk do të lejohet futja e sendeve të forta, shisheve me tapë, çelësave, monedhave apo metaleve (të çfarëdo lloji),”-raportoi policia.
Drejtoria Vendore e Policisë Elbasan i kërkon qytetarëve që të minimizojnë lëvizjen me automjete në akset që të çojnë drejt stadiumit, çka do të sillte një ndihmesë në mbarëvajtjen e këtij aktiviteti.
Ndeshja, e vlefshme për eliminatoret e Kampionatit Evropian të Futbollit 2020, nis në orën 20:45 dhe i pranishën në stadium do jetë edhe presidenti i vendit, Ilir Meta.
g.kosovari
