Sonte përballja, De Biasi: Danimarka favorite, por ne luajmë me zemër
Trajneri i kombëtares shqiptare, Gianni de Biasi, e ka cilësuar Danimarkën si favorite për fitimin e ndeshjes që luhet sonte në darkë. Por ai theksoi se Shqipëria luan me zemër dhe se do të provojë të bëjë rezultat në këtë sfidë.
“Danimarka është skuadër me lojtarë me shumë përvojë dhe shumë e fortë. Ajo që të bën përshtypje është fakti që luajnë si një grup i vetëm dhe ka një trajner me shumë përvojë që punon prej vitesh dhe në mënyrë të shkëlqyer. Nuk do të jetë një ndeshje e lehtë, por loja fillon 0-0”, tha De Biasi. Ndërkohë që ai vuri në dukje se “skuadra jonë ka djem të rinj që luajnë me zemër dhe vitet e fundit kanë fituar eksperiencë duke mos u mundur asnjëherë. Në takimin e parë barazuam 1-1, por kishim shance për të shkruar në 2-0. Në këto eliminatore kemi arritur rezultate që nuk i kishim arritur më parë. Megjithatë jemi me këmbë në tokë, sepse kemi bërë vetëm gjysmën e rrugës. Ndaj Danimarkës luajmë një pjesë të rëndësishme të objektivit. E kemi përgatitur mirë këtë ndeshje dhe shpresoj që gjërat të shkojnë sic duhet”.
Ndërsa për kapitenin Lorik Cana edhe një barazim do të ishte i kënaqshëm. “Mendoj se do të japim më të mirën në këtë ndeshje të rëndësishme. Kemi mungesa por nuk dorëzohemi. Kemi shumë lojtarë të rinj në këto eliminatore, por deri tani po realizojmë ëndrrën e shqiptarëve, që është kualifikimi në Europian. Jemi në gjysmë të rrugës por kjo ndeshje është vendimtare për të dyja skuadrat. Humbja është e papranueshme, ata janë favorit por ne do të bëjmë lojën tonë. Dhe barazimi do të ishte një rezultat i kënaqshëm”, deklaroi Cana.
