Detaje tronditëse janë zbuluar lidhur me sulmin e Hamasit më 7 tetor dhe Benjamin Netanjahun.
Sipas disa burimeve rajonale të gazetës izraelite ‘Haaretz’, rreth dhjetë ditë para agresionit, kryeministri izraelit ishte paralajmëruar personalisht nga Presidenti i Emirateve të Bashkuara Arabe, Mohammed bin Zayed, për një ofensivë të madhe dhe të afërt të Hamasit.
Sipas të njëjtit raport, Netanyahu nuk e përcolli këtë informacion te drejtuesit e sigurisë izraelite, ndërsa më herët edhe shërbimet Shin Bet e kishin diskutuar paralajmërimin, por nuk e kishin interpretuar si një kërcënim konkret nga Gaza.
Haaretz shkruan se Mohammed bin Zayed ishte informuar për planet e Yahya Sinwar dhe kishte paralajmëruar për gjakderdhje, destabilizim të rajonit dhe rrezik për Marrëveshjet e Abrahamit.
Por, zyra e Netanyahut i ka mohuar kategorikisht këto pretendime, duke deklaruar se kryeministri nuk ka biseduar me presidentin e Emirateve në atë periudhë dhe nuk ka marrë prej tij asnjë paralajmërim.
Publikimi ka shkaktuar reagim të menjëhershëm të opozitës izraelite, e cila kërkon që Netanyahu të mbajë përgjegjësi dhe të ngrihet një komision shtetëror hetimor për dështimet që i paraprinë sulmit të 7 Tetorit.
Ish-kryeministri Naftali Bennett dhe figura të tjera opozitare e kanë akuzuar Netanyahun për neglizhencë dhe për përpjekje për t’iu shmangur përgjegjësisë politike.
Ndërsa ish-shefi i shtabit të ushtrisë izraelite, Gadi Eisenkot, ka deklaruar se provat e reja kërkojnë një hetim të plotë mbi atë që ai e cilëson si dështim katastrofik të udhëheqjes izraelite.
