Nëse zgjedhjet do të ishin sot, koalicioni i majtë do të fitonte me 60%. Ky është rezultati i sondazhit të dytë të organizuar nga A1 Report në bashkëpunim me institutin italian “Piepoli”.
Sipas sondazhit të bazuar në anketimet e 800 votuesve në rang kombëtar dhe 500 votuesve për Bashkinë e Tiranës më 28 maj, 59% e të anketuarve e kanë vlerësuar si të dobët punën e bërë nga Lulzim Basha për Bashkinë e Tiranës. 17% e kanë vlerësuar si të mjaftueshme, ndërsa vetëm 23% e kanë vlerësuar si të mirë . 1% e të anketuarve nuk kanë dhënë përgjigje.
Në sondazhin e dytë shihet një rënie e vlerësimit të kandidatit demokrat për Tiranën, për periudhën kur ai ka qenë Ministër i Shëndetësisë. Nga 70% e të anketuarve që e kanë vlerësuar si të mirë punën e bërë nga kandidati i PD për Bashkinë e Tiranës, Halim Kosova, vetëm 54 % prej tyre kanë të njëjtin mendim në sondazhin e dytë.
Duke bërë edhe një krahasim me zgjedhjet e 2013-s dhe me sondazhin e parë, rezultatet e dyta të anketimit të institutit italian nxjerrin si fitues të majtët me 60 %, ndërsa të djathtët do të merrnin 38 %. Sipas sondazhit të dytë e majta jo vetëm që njeh rritje në krahasim me vitin 2013, por rritet me 1.5 pikë edhe në krahasim me sondazhin e parë të realizuar më 15 maj dhe i bërë publik më 20 maj nga A1 Report. E ndërsa e majta rritet në krahasim me sondazhin e parë, koalicioni i djathtë njeh ulje me 1.5 pikë.
