Sondazhi i PD për Tiranën zbardh pse po sulmohet Veliaj

EKSKLUZIVE/ Bashkia e Tiranës nuk është tashmë pa qëllim kryefjala e luftës politike të PD-së. Të gjitha këto sulme, ku janë përfshirë edhe disa aktorë, duke filluar që nga Presidenti, Bujar Nishani, deputetët e PD-së, si dhe disa grupime ambientaliste (jo të gjitha) janë të koordinuara në funksion të zgjedhjeve të ardhshme parlamentare. Vendosja e Kryetarit të Bashkisë së Tiranës, Erion Veliaj, në axhendën kryesore të betejës politike të PD-së, ndonëse është tentuar të mvishet me mantelin e mbrojtjes së ambientit dhe Parkut të Liqenit, dukshëm shpërfaq interesa të pastra elektorale. Javanews ka arritur të mësojë se në një sondazh të fundit të zhvilluar nga organizata pranë PD-së, lidhur me Tiranën, ka rezultuar se demokratët rrezikojnë të humbasin mandate të tjera në Tiranë.

Gjatë zgjedhjeve të vitit 2013, PD-ja bashkë me aleatët e saj (PD- PR- PDIU), arriti të sigurojë 13 mandate, kundrejt 19 që mori koalicioni PS- LSI. Një diferencë e madhe mandatesh, po të kihet parasysh se në një farë mënyre Tirana përcakton edhe kahjen se cila parti apo koalicion partisht do t’i fitojë zgjedhjet. Thënë qartë, nëse humb në Tiranë ke humbur zgjedhjet. Kjo diferencë e madhe mandatesh bëhet më e dukshme po të kihet parasysh se PD-ja në vitin zgjedhor 2013 ishte në qeveri dhe drejtonte edhe Bashkinë e Tiranës. Por përgjatë vitit 2016, kohë në të cilën është realizuar edhe sondazhi i PD-së për Tiranën nga organizata pranë saj, mësohet se PD ka humbur akoma më shumë terren. Në bazë të këtij sondazhi PD-ja rrezikon të humbasë edhe 2 mandate duke çuar numërin e mandateve të saj nga 11 në 9. Këtu duhet pasur parasysh se në totalin e 13 mandateve të koalicionit të PD-së, 1 mandat ëshhtë i PR, ndërsa 1 mandat i PDIU, që tashmë është në qeveri. Pra PD-ja ka 11 mandate të prodhuara nga zgjedhjet e vitit 2013. Ndërsa në zgjedhjet e ardhshme numëri i mandateve në rastin më të mirë mund të qëndrojë në të njëjtën kuotë pra 11 mandate ose rrezikon të humbasë dhe 2 mandate.

Gjithësesi ajo që është e kuptueshme ka të bëjë me faktin se nëse PD nuk arrin të ulë ndjeshëm diferencën me koalicionin e majtë për numërin e mandateve në Tiranë, ajo s’ka asnjë shpresë për të dalë fituese në zgjedhje.  Janë pikërisht këto llogari elektorale, ato të cilat kanë bërë që PD të jetë agresive ndaj kryetarit të Bashkisë së Tiranës, Veliaj. Një Tiranë e qeverisur më mirë në nivel lokal do të ndikonte më pozitivisht në zgjedhje. Të njëjtin efekt prodhoi shumë kohë më parë dhe kryeministri, Edi Rama, kur ishte kryetar Bashkie i Tiranës, duke ndikuar jo pak me punën e tij si kryebashkiak, në rezultatet zgjedhore të PS. Edhe atëhere Rama u sulmua nga PD në mënyrë shumë agresive, më shumë madje se ish- kryeministrat Fatos Nano dhe Ilir Meta. Edhe tani ndaj Veliajt, po përvijohet e njëjta strategji, me qëllim zgjedhjet e ardhshme parlamentare.

Armando Meta

(javanews.al)