37,8% e shqiptarëve shprehet se janë prekur nga COVID-19. Thënë ndryshe, afërsisht 830,000 qytetarë.
Rezultati i dalë nga anketimi i muajit shtator-tetor i Barometrit me kompaninë MRB në Euronews Albania, jep edhe një pasqyrë të shpërndarjes gjeografike të këtyre qytetarëve.
Shumica e qytetarëve të prekur (29.3%) shprehen se janë infektuar në periudhën shtator 2020 – dhjetor 2020.
Në Tiranë, 42,8% e qytetarëve deklaruan se e kanë kaluar koronavirusin. E ndarë në rajone, niveli më i lartë i infektimeve vihet re se është në Shqipërinë e Mesme.
Nga të prekurit, 60% shprehen se e kanë kaluar virusin me simptoma të lehta kurse 17% me simptoma të rënda.
Të pyetur nëse kanë dikë nga familja bërthamë e deri tek kushërinjtë e parë, që ka humbur jetën nga COVID-19, 7,9% e qytetarëve thanë po.
Sipas të dhënave të Ministrisë së Shëndetësisë, që prej fillimit të pandemisë në Shqipëri ka pasur 2,855 viktima të shkaktuara nga coronavirus.
Ndërkohë, gati 1/3 e qytetarëve shqiptarë (32,7%) janë të bindur se nuk duan ta bëjnë vaksinën kundër COVID-19 dhe 25,9% të tjerë mendojnë se nuk do ta bëjnë vaksinën në të ardhmen.
Kurse 22,8% e të anketuarve nga Euronews Albania dhe MRB, nuk e dinë nëse duan ta bëjnë apo jo vaksinën kundër Covid-19.
Vetëm 18,6% e shqiptarëve u shprehën të bindur se dëshirojnë të bëjnë këtë vaksinë.
Rezultati u mundësuar nga “Barometri” në Euronews Albania, pas anketimit me 1000 qytetarë ballë për ballë.
Arsyeja kryesore që i ka shtyrë shqiptarët të mos e bëjnë vaksinën deri tani, është se nuk janë të bindur për sigurinë e saj pasi kështë shprehen 48% e të pyeturve.
Arsyeja tjetër më e përhapur tek ata që nuk janë vaksinuar është mungesa e besimit tek efikasiteti i vaksinës (29,7%).
Deri më tani 43,7% e shqiptarëve shprehen se janë vaksinuar me të paktën një dozë. Pjesa më e madhe, 56% e shqiptarëve që nuk janë të vaksinuar, i takojnë moshës 18-24 vjeç.
