Kryetari i Partisë Demokratike Sali Berisha ka komentuar përgjigjen e sotme të kryeministrit Edi rama, lidhur me kërkesën e dy shoqatave për rritjen e rrogave të gjyqtarëve.
Në një prononcim për mediat pasi u paraqit në ambientet e Prokurorisë së Posaçme SPAK, si pjesë e masës “detyrim paraqitjeje” ndaj tij, lidhur me çështjen e dosjes “Partizani”, Berisha pranoi se kryeministri Rama kishte të drejtë kur e konsideronte këtë “kompetencë” të ekzekutivit, por sipas tij gjyqtarët dhe prokurorët kanë të drejtën e tyre.
“Ai po bën gjithçka që të ndikojë sepse e ka jashtëzakonisht të rëndësishme, por lidhur me pagat dua të them një të vërtetë, asnjë diskutim që piramida e pagave është kompetencë e ekzekutivit dhe vetëm e ekzekutivit, përveçse ndërmarrjet ekonomike publike. Në këtë kontekst, në pamje të parë, gjykata s’ka asnjë lidhje, por nëse ekzekutivi e ndërton kokëposhtë piramidën, unë nuk e kuptoj se gjykata nuk mund të ndërhyjë.
Piramida parashikon rrogën më të lartë kreut të shtetit. Nëse ekzekutivi ka firmosur për faqen e zezë të tij që Altin Troplini të jetë njeriu më i paguar, nga kufiri në Slloveni e gjer në Qipro, ai ka bërë jo piramidë të rrogave në frymën e Kushtetutës dhe ligjit, por në përputhje me interesat e tij personale. Vërtet ajo është kompetencë ekskluzive e ekzekutivit, por është i detyruar ta ushtrojë atë kompetencë në frymën e ligjit. Kur ai i ka vënë mecenarit të SPAK-ut rrogën mbi 7 mijë euro, atëhere çdo gjykatës i lartë, kushtetues, prokuror i përgjithshëm kanë të drejtë të ndihen të shkelmuar, të poshtëruar.”, tha Berisha, duke iu përgjigjur një pyetjeje nga gazetarët, lidhur me qëndrimet e kreut të qeverisë.
Më herët, kryeministri Edi Rama ka publikuar një video në rrjetet sociale, ku foli për kërkesën e gjyqtarëve për rritjen e pagave të tyre, për të cilat tha se janë po aq sa në Greqi, madje dyfish me pagat në dy vendet e tjera fqinje, Maqedoninë e Veriut dhe Malin e Zi.
