Një numër i konsiderueshëm britanikësh, për herë të parë shprehën keqardhje për rezultatin e referendumit të 23 qershorit pro daljes nga Bashkimi Evropian, bëri të ditur sondazhi “YouGov” publikuar sot në të përditshmen “The Times”.
Në përgjigje të pyetjes “Me këtë rezultat besoni se Britani e Madhe veproi drejtë apo gabim në votimin për largimin nga BE?”, 45 për qind e personave të anketuar shprehën keqardhje për alternativën Brexit, 43 për qind e miratuan një qëndrim të tillë dhe 12 për qind ishin të lëkundur, shtoi ky anketim i realizuar të martën dhe të mërkurën në një target grup prej 1590 persona në moshë madhore.
“Është hera e parë që ka një numër kaq të madh personash që shprehen se referendumi u mbyll me një rezultat negativ”, thekson “The Times” duke vlerësuar se ky fakt nxjerr gjithnjë e më tepër në pah ndasitë në vend.
Në thelb, sondazhi bën me dije se 85 për qind e personave që votuan për largimin nga BE vijojnë të jenë të kënaqur nga zgjedhja e bërë, ndërsa 89 për qind e pro-BE besojnë ende sot se referendumi duhet të kishte dalë me një rezultat ndryshe./b.d
