Nga Eduard Zaloshnja
Reth 43% e banorëve të Shqipërisë në moshë votimi kanë opinion pozitiv për punën e Edi Ramës pas zgjedhjeve të qershorit, ndërsa 35% kanë opinion negativ (22% kanë opinion neutral ose nuk e shprehin atë). Këto janë rezultatet e një sondazhi elektronik që zhvillova gjatë fundjavës për revistën Follow Business Albania me rreth 4000 të anketuar në shkallë kombëtare. Kampioni u ripeshua, për ta përfaqësuar elektoratin shqiptar sa më mirë demogrfikisht dhe politikisht. Maksimumi i marzhit të gabimit për këtë sondazh ishte plus/minus 2.3 pikë përqindje.
Të përkthyera në numër votuesish, këto rezultate na tregojnë se rreth 900 mijë votues kanë opinion pozitiv për Ramën, ndërsa rreth 735 mijë kanë opinion negativ (rreth 465 mijë kanë opinion neutral ose nuk e shprehin atë).
Ndërsa për punën e Lulzim Bashës pas zgjedhjeve të qershorit, vetëm 23% e banorëve të Shqipërisë në moshë votimi kanë opinion pozitiv, ndërsa 48% kanë opinion negativ (29% kanë opinion neutral ose nuk e shprehin atë).
Të përkthyera në numër votuesish, këto rezultate na tregojnë se vetëm 480 mijë votues kanë opinion pozitiv për Bashën, ndërsa mbi 1 milion kanë opinion negativ (rreth 620 mijë kanë opinion neutral ose nuk e shprehin atë).
Të anketuarit u pyetën edhe sesi do të votonin sot, në qoftë se zgjedhjet parlamentare do të përsëriteshin. Bazuar në përgjigjet e tyre dhe në rezultatet e qershorit, mund të ekstapolohet se partitë kryesore do të kishin ndryshime jo shumë të ndjeshme në rezultate: PS 770 mijë vota, PD 430 mijë vota dhe LSI 190 mijë vota (partitë e vogla së bashku do të merrnin rreth 40 mijë vota).
