Kancelarja gjermane Angela Merkel nuk do ta ketë të thjeshtë që të sigurojë një mandat të katërt nga zgjedhjet parlamentare të 24 shtatorit, teksa diçka e tillë konfirmohet edhe nga sondazhet, kur rivali i saj social-demokrat, Martin Schulz, ka regjistruar një rezultat më pozitiv.
Në projeksionet e realizuara nga prestigjozja gjermane BILD, qëndra e majtë do të fitonte 31.5% të votave nëse zgjedhjet do të zhvilloheshin në këtë fundjavë, ndërkohë që kristian-demokratët e Merkel së bashku me partinë simotër CSU-në, do të ndaleshin në 30.5% të votave.
Në këtë mënyrë, në rradhët e SPD-së janë rritur shpresat se kjo forcë politike mund të marrë në dorën frenat e ekzekutivit pas më shumë se 15 vitesh. Ish-Presidenti i Parlamentit Europian, Martin Schulz, i ka dhënë një frymë të re partisë me paraqitjen e kandidaturës së tij. Pavarësisht rezultatit që do të prodhojnë zgjedhjet, pritet që social-demokratët dhe CDU të bashkëpunojnë për një tjetër mandat, por në pikëpyetje mbetet lidershipi i këtij koalicioni.
Merkel ka patur një rënie të ndjeshme të popullaritetit kryesisht ndikuar nga aplikimi i politikës së dyerve të hapura për emigrantët. Në lidhje me këtë çështje, kancelarja ka patur kontestime të shpeshta edhe nga partnerët e koalicionit.
Vendin e tretë në sondazhin e realizuar nga BILD e zuri Alternativa për Gjermaninë, partia e ekstremit të djathtë e cila ka shfaqur qëndrime kundër strehimit të emigrantëve. Kjo forcë politike është ndalur në shifrën 11%. Krahasuar me disa muaj më parë, AFD ka shënuar rënie, pasi në sondazhet e mëhershme, partia e ekstremit të djathtë kishte arritur deri në 15%. ora/a.k
