Kërkohet burgimi i dy deputetëve. Ka marrë një rrjedhë të relativisht të papritur procesi i hetimit gjyqësor ndaj dy deputetëve të Partisë Socialiste, Arben Ndoka dhe Pjerin Ndreu. Ata janë nën akuzë për goditje të kolegut të tyre të PD-së Gent Strazimiri. Sot, kolegji penal i Gjykatës së Lartë dëgjoi kërkesën e prokurorisë për shpalljen faktorë të dy deputetëve dhe dënimin e tyre përkatësish me një vit dhe pesë muaj heqje lirie. Nëse kjo kërkesë e prokurorit Adnand Xholi do të pranohet, edhe me konvertimin e dënimit me dënim alternativ, punë në shërbim të komunitetit, fati i dy deputetëve merr një drejtim tërësisht të paparashikuar nga ta në fillim të sesionit të Kuvendit në 2013-ën: ata humbasin mandatin e tyre të deputetit.
Neni 71 i Kushtetutës përcakton se: “Mandati i deputetit mbaron… kur dënohet me vendim gjyqësor të formës së prerë për kryerjen e një krimi”. Gjykata e Lartë është dhe shkalla e fundit e gjyqësorit dhe ata mund të ankimohen vetën në Kushtetuese, me shpresë që ajo të sillet si “gjykatë e shkallës së katërt”. Në të gjitha rastet, hakmarrja e Strazimirit ka qenë totale, sepse u servir e ftohtë dhe e plotw dhe nga kuzhina e drejtësisë shqiptare.
Nëse ndodh një skenar i tillë deri në fund, dy deputetët Ndoka dhe Ndreu do të zëvendësohen nga deputetët e rradhës në listën e Lezhës dhe të Tiranës.
