Shefi i Departamentit të UEFA-s për Integritetin dhe Disiplinën, Emilio Garcia, ka pranuar sot se së shpejti, Skënderbeu mund të përballet me masa të mirëfillta disiplinore, pasi ata të dhëna me përjashtimin njëvjeçar nga Liga e Kampioneve ishin vetëm paraprake.
“Organet disiplinore të UEFA-s po marrin në konsideratë masa disiplinore të vërteta”, tha ai në një panel kundër manipulimit të ndeshjeve në Konventën Ndërkombëtare të Sportit.
Ai shpjegoi se çështja kishte filluar me dyshimet e UEFA-s mbi dyshimet për manipulimin e dy kualifikuesve të Ligës së Kampioneve dhe dy ndeshjeve të fazës në grupe të Ligës së Europës.
Dënimi i UEFA-s, me një vit pezullim nga Liga e Kampioneve, mbeti në fuqi nga KAS i Lozanës, i cili e quajti të drejtë edhe pse të bazuar në evidencën e luhatjeve të koeficienteve të basteve.
“Kjo ishte hera e parë kur ne ishim të aftë të tregonim para KAS një seri të gjatë raportimesh”, tha Garcia. “Shifrat nuk gënjejnë dhe luhatjet e basteve gjithashtu”, shtoi ai duke shpjeguar se gjyqtarët e KAS pranuan se monitorimi i basteve është “një evidencë e besueshme”.
Mbrojtja e drejtuesve të Skënderbeut para opinionit publik, që pas dënimit të UEFA-s, ishte e bazuar pikërisht mbi faktin se dënimi kishte qenë njëvjeçar, duke e cilësuar gjithçka si aludim dashakeq. Të njëjtin qëndrim ka mbajtur gjithmonë edhe Federata Shqiptare e Futbollit.
Panorama/d.i.